Rusia ka hapur çështje penale kundër gazetarit zviceran për kalimin e kufirit të Kurskut

Keystone EPA/ROMAN PILIPEY

Shërbimi sekret rus ka hapur procedimin ndaj gazetarit zviceran, Kurt Pelda, i cili akuzohet se ka kaluar ilegalisht kufirin shtetëror të Federatës Ruse në rajonin e Kurskut.

Disa agjenci lajmesh raportuan akuzat të hënën bazuar në një komunikatë nga shërbimi i brendshëm rus i inteligjencës FSB, i cili u vu gjithashtu në dispozicion të agjencisë së lajmeve Keystone-SDA. Pelda, i cili raporton rregullisht nga Ukraina për CH Media, po përballet me një dënim me burg deri në pesë vjet.

FSB ka hapur procedim edhe ndaj gazetares Catherine Norris Trent, e cila punon për kanalin televiziv francez France 24. Gjithsej 14 gazetarë të huaj janë akuzuar për të njëjtën vepër që nga 17 gushti, transmeton albinfo.ch.

Më 6 gusht ushtria ukrainase nisi një ofensivë të befasishme në rajonin kufitar Kursk, e para nga një ushtri e huaj në Rusi që nga Lufta e Dytë Botërore. Forcat e armatosura ruse që atëherë kanë nisur një kundërofensivë dhe pretendojnë se kanë rifituar terren.

Megjithatë, Ukraina ende pretendon se kontrollon dhjetëra lokalitete. Disa media të huaja kanë raportuar nga zona e pushtuar nga forcat ukrainase.