Gjermani, seminar mbi përvojat e mësuesve në diasporë

Bëhet e ditur se në qytetin Zusmarshausen të Augsburgut, në Bavari, u mbajt një seminar dyditor më temën “Trajtimi dhe shkëmbimi i përvojave të mësimdhënësve me klasa heterogjene”.

Ky event, i organizuar nga Liga e Arsimtarëve dhe Prindërve Shqiptarë (LAPSh), mblodhi mësimdhënës dhe përfaqësues të diplomacisë shqiptare dhe kosovare, për të ndarë praktikat më të mira për sfidat e mësimdhënies në diasporë.

Seminari u hap nga profesor Mustafë Krasniqi, i cili mirëpriti konsullatën e Shqipërisë dhe të Kosovës në Mynih, përfaqësuar nga konsullja e përgjithshme, Genta Mburimi, konsulli Afrim Nura dhe Naser Bejtullahu. Të pranishmit u njohën me ligjëratën e dr. Besnik Ramës, e cila u fokusua në përfshirjen e rrethanave lokale në mësimdhënie dhe metodat që ndihmojnë nxënësit e niveleve të ndryshme gjuhësore dhe kulturore.

Gjatë punëtorive të ditës së dytë, mësimdhënësit morën pjesë në diskutime të strukturuara mbi organizimin dhe vlerësimin e mësimit, motivimin e nxënësve dhe ndërtimin e marrëdhënieve efektive me prindërit. Praktikat inovative për klasat heterogjene, të cilat përfshijnë studentë me nivele të ndryshme të njohurive, u shfaqën si një nga temat kryesore të diskutimit.
Në përfundim të seminarit, mësimdhënësit morën certifikata trajnimi, me vlerësimin e organizatorëve për përkushtimin e tyre në mësimin e gjuhës amtare dhe ruajtjen e identitetit kulturor në diasporë. Ky event jo vetëm që nxiti bashkëpunimin mes mësimdhënësve, por gjithashtu tregoi përkushtimin e komunitetit shqiptar për edukimin e gjeneratave të reja në diasporë.