Kosova figuron si shtet i pavarur edhe në 697 banka gjermane

Ambasadori i Kosovës në Gjermani, Faruk Ajeti, ka dhënë një lajm që lidhet me njohjen e shtetësisë së Kosovës në sistemin bankar gjerman. Ai ma njoftuar se pas Deutsche Bundesbank dhe Commerzbank, edhe në 697 banka tjera gjermane, të cilat janë pjesë e Volksbanken Raiffeisenbanken, Republika e Kosovës do të figurojë si shtet i pavarur në platformat e tyre.

“Falë reagimit tuaj vigjilent dhe angazhimit tonë diplomatik, tani e tutje edhe ky gabim nuk do të ekzistojë më në platformat e Volksbanken Raiffeisenbanken, tek të cilat shteti ynë ose është lidhur gabimisht me Serbinë ose nuk ka ekzistuar fare në mesin e shteteve tjera, siç mund të vërehet edhe nga dëshmitë përkatëse”, ka shkruar Ajeti në ‘Facebook’.

Procesi i përditësimit të të gjitha sistemeve bankare të këtyre institucioneve të Volksbanken Raiffeisenbanken, ku Republika e Kosovës do të shfaqet si shtet i pavarur, sipas ambasadoeit Ajeti do të zgjatë disa muaj dhe deri në prill të vitit 2025 do të përfundojë në tërësi.