Kosovë: Rreth 700 të infektuar me zgjebe për 9 muaj

Rreth 700 persona janë infektuar me zgjebe brenda nëntë muajve të këtij viti në Kosovë. Kështu ka bërë të ditur dermatologia në Klinikën e Dermatologjisë në Qendrën Klinike Universitare të Kosovës (QKUK), Fatime Kokollari, për Kosova Press. Raste të të prekurve me zgjebe janë regjistruar edhe në Shqipëri dhe vende të tjera të rajonit.

Në Qendrën Spitalore në Tiranë nuk hospitalizohen të prekurit me zgjebe, ndërsa në QKUK, herë pas herë pacientëve u duhet të blejnë vetë barnat për kurimin nga ky parazit.

Në një prononcim për KosovaPress, Kokollari thotë se numri i të hospitalizuarve nga zgjeba këtë vit ka shënuar rënie, krahasuar me vitin e kaluar.

“Personat e sëmurë me skabies janë gjithmonë prezent në vizitat ambulatore të Klinikës së Dermatologjisë. Megjithatë, statistikat tona tregojnë se sëmundja prej vitit të kaluar, sivjet është në rënie e sipër dhe diku të hospitalizuar diku 30 për qind më pak se vitin e kaluar. Ndërsa, përafërsisht vizita ambulatore në këta nëntë muajt e fundit sillet diku rreth 700 persona të infektuar, gjë që statistika është e përafërt me vitin e kaluar”, thotë Kokollari.

Dermatologia në QKUK, Fatime Kokollari, tregon se nga janari deri në shtator rreth 45 pacientë kanë qenë të hospitalizuar.

“Të hospitalizuar në Klinikën e Dermatologjisë nga skabiesi sivjet prej janarit deri në shtator kanë qenë 45 (pacientë). Ndërsa, vitin e kaluar në po të njëjtin muaj, prej janarit deri në shtator kanë qenë 62. Që i bie në përqindje diku 27 për qind më ulët është numri i hospitalizuarve sivjet krahasuar me vitin e kaluar”, tregon Kokollari.

Ndër të tjera, Kokollari tregon se për shkak të mungesës së ilaçeve në barnatoren e Dermatologjisë, herë pas here, pacientëve u duhet t’i blejnë vetë ato për t’u kuruar nga zgjeba, gjatë kohës sa ata janë të shtrirë në spital.

“Pacientët e prekur me skabies që hospitalizohen në dermatologji, iu duhet të blejnë diçka prej barnave, prej terapisë kohë pas kohe, jo gjithmonë jemi të furnizuar”, thekson Kokollari.