Fundosja e varkës në Detin e Kuq, gjendet i gjallë zvicerani i zhdukur

Foto: Det, pixabay

Ekipet e shpëtimit gjetën katër trupa dhe katër të mbijetuar të martën pasi një varkë turistike u mbyt në brigjet lindore të Egjiptit, tha guvernatori i Detit të Kuq, Amr Hanafi. Shtetasi i dytë zviceran në bord, i cili ishte zhdukur, është mes të mbijetuarve.

Mes të mbijetuarve janë dy belgë, një zviceran dhe një egjiptian, tha guvernatori për AFP, duke e çuar numrin total të të mbijetuarve në 32.

Në bordin e anijes ndodheshin gjithsej dy shtetas zviceranë. Të hënën pasdite, Departamenti Federal i Punëve të Jashtme (FDFA) informoi Keystone-ATS se një nga këta persona ishte shpëtuar dhe ishte i padëmtuar dhe se i dyti ishte zhdukur. Ky shtetas zviceran tani është gjetur.

Katër të vdekurit ende nuk janë identifikuar dhe tetë persona janë ende të zhdukur. “Operacionet e shpëtimit po vazhdojnë sot, me mbështetjen e një helikopteri ushtarak dhe një fregate si dhe disa zhytës”, tha Guvernatori i Detit të Kuq, Amr Hanafi.

Varka mbante 31 turistë të kombësive të ndryshme si dhe 13 anëtarë të ekuipazhit kur u godit nga një valë e madhe herët të hënën, duke bërë që ajo të përmbysej pranë Marsa Alam në Egjiptin juglindor./RTS