Të shtunën promovohet “Agimi i Lirisë”, monografia për Agim Ramadanin

Foto: Dukagjini Publishing House

“Agimi i Lirisë” titullohet monografia për heroin dhe luftëtarin e lirisë Agim Ramadani, e cila vjen në tri vëllime. Përgatitur mjeshtërisht nga shkrimtari Ibrahim Kadriu, ribotimi i kësaj monografie nga shtëpia botuese “Dukagjini” do të promovohet më 30 nëntor, ditën e shtunë, në orën 17:00, në librarinë “Dukagjini” (sheshi “Nëna Terezë”).

Për të diskutuar për figurën dhe kontributin e pashoq të heroit Agim Ramadani dhe tri vëllimet e monografisë, në panel do të jenë të pranishëm:

Ibrahim Kadriu – autori;

Xhevat Syla – shkrimtar;

Rrustem Berisha – komandant;

Bahri Gashi – profesor dhe

Shukrije Ramadani, bashkëshortja e Agim Ramadanit.

Promovimi do të moderohet nga Liridona Bytyçi.

Agim Ramadani lindi më 3 maj 1963 në fshatin Zhegër të komunës së Gjilanit. Ai ishte luftëtar, artist e shkrimtar, që veprën, e në fund edhe jetën ia fali Kosovës. I njohur ndryshe me nofkën “KATANA”, ai ishte njëri prej komandantëve më të shquar dhe më aktivë të Ushtrisë Çlirimtare të Kosovës (UÇK), si dhe komandant i Zonës së Koshares. Ishte komandant i Brigadës 138 deri në ditën e rënies heroike të tij. Pas përfundimit të luftës, ai u shpall Hero i Kosovës.