Ministria e Arsimit, marrëveshje me Caritas-in zviceran

Ky projekt do të mundësojë që të pajisen 150 institucione të arsimit parafillor me pajisje moderne, por edhe me edukatorë dhe mësues të përgatitur për moshën e fëmijëve

Sot, në Ministrinë e Arsimit është bërë nënshkrimi i  Marrëveshjes së Mirëkuptimit mes përfaqësuesit të Caritas-it zviceran dhe ministrit të Arsimit, Shkencës dhe Teknologjisë, z. Arsim Bajrami. Me këtë marrëveshje mbështetet Strategjia Kombëtare për Edukimin parashkollor

Siç bëhet e ditur në një komunikatë për medie, të lëshuar nga MASHT, Marrëveshja ka për qëllim promovimin e një edukimi gjithëpërfshirës parashkollor në Kosovë, në përputhje me standardet e zhvillimit dhe të mësuarit në fëmijërinë e hershme dhe lehtësimin e integrimit të fëmijëve në sistemin e edukimit parafillor në Kosovë.

Ministri Bajrami, me këtë rast theksoi se, Qeveria e Kosovës është e përkushtuar që të investojë në edukimin parafillor, sepse investimi në zhvillimin e fëmijërisë së hershme është investim në të ardhmen e një shteti. Ai me këtë rast ka vlerësuar se, me nënshkrimin e kësaj Marrëveshje me Caritas-in Zviceran, do të investohet në ngritjen e kapaciteteve dhe standardeve të ofrimit të arsimit parafillor.

“Ky projekt do të mundësojë që të pajisen 150 institucione të arsimit parafillor me pajisje moderne, por edhe me edukatorë dhe mësues të përgatitur për moshën e fëmijëve, sepse bëhet fjalë për shkollim në fëmijëri të hershme”, tha ministri Bajrami, ndërsa theksoi se të investosh në fëmijë të vegjël, do të thotë të investosh në të ardhmen e një shteti.

Ministri Bajrami, po ashtu, rithekoi angazhimin e vazhdueshëm për ndërtimin e një sistemi gjithëpërfshirës në kuptimin shumëdimensional, me theks të veçantë ofrimin e një arsimimi cilësor për komunitetet pakicë.

Ndërsa Krystyna Marty Lang, ambasadore e Zvicrës në Kosovë ka theksuar se, Projekti i Caritas-it Zviceran është në harmoni me Strategjinë Kombëtare të Kosovës për Edukimin Parashkollor që është i sponsorizuar nga MAShT dhe nënshkrimi i sotëm konfirmon mbështetjen e palëkundur të Zvicrës për Kosovën.

Nga ana e tij,  shefi i misionit të Caritas- it Zviceran, Kreshnik Basha tha se përmes këtij projekti, Caritas-i do të ofrojë mbështetje për arsimim parashkollor në tërë Kosovën”, thuhet në përfundim të komunikatës..