SHBA: DASH po punon me Kosovën për të luftuar korrupsionin

Ambasada e Shteteve të Bashkuara në Kosovë, në prag të fillimit të “Javës Kundër Korrupsionit”, ka thënë se Departamenti Amerikan i Shtetit po punon me të gjithë partnerët, përfshirë Kosovën, për të forcuar hetimin dhe luftimin e korrupsionit.

Përmes një njoftimi në rrjetin social “Facebook”, ambasada ka theksuar se korrupsioni minon demokracinë, nxit paqëndrueshmërinë dhe kërcënon sigurinë globale.

“Departamenti Amerikan i Shtetit po punon me partnerë anembanë globit, përfshirë Kosovën, për të forcuar hetimin dhe ndjekjen penale të korrupsionit, promovimin e transparencës dhe fuqizimin e shoqërisë civile dhe mediave të pavarura për të ekspozuar korrupsionin dhe për të avancuar reformat”, thuhet në njoftim, transmeton albinfo.ch.

Java Kundër Korrupsion organizohet falë mbështetjes së Departamentit të Shtetit Amerikan – Byrosë për Çështje të Narkotikëve Ndërkombëtarë dhe Zbatimit të Ligjit (INL), teksa këtë vit fillon të hënën, më 9 dhjetor.