Vlora duhet të ndjekë një kurs të gjermanishtes

Gjatë tre muajve të fundit, në qytetin e Bernës bashkëbisedimin e parë në komunë e kanë zhvilluar 371 persona

Nga fillimi janarit të këtij viti, në Kantonin e Bernës ka hyrë në fuqi ligji i ri, i ndryshuar i integrimit. Në thelb të këtij ligji është modeli treshkallësh përmes të cilit të huajt e ardhur rishtas (kryesisht përmes bashkimit familja) mbështeten dhe përcillen në mënyrë sistematike. Ligji për integrim ndërkaq, nuk vlen edhe për azilkërkuesit, të pranuarit e përkohshëm dhe për personat me status të pranuar të refugjatit.

Shkalla e parë është një bashkëbisedim mirëseardhjeje. Ai zhvillohet me paraqitjen në komunën përkatëse dhe është i detyrueshëm. Në rast se nëpunësit në një rast të tillë konstatojnë te i porsaardhuri një nevojë të theksuar për kurse te gjuhës, arsimim/punë ose nevoja të veçanta sa u perket fëmijëve të tyre të moshës së mitur, të huajt në fjalë përcillen më tutje për shkallën e dytë në njërën nga katër qendrat profesionale në Kantonin e Bernës.

Gjatë tre muajve të fundit, në qytetin e Bernës bashkëbisedimin e parë në komunë e kanë zhvilluar 371 persona. 87 prej tyre janë përcjellë për bashkëbisedimin e dytë në Qendrën Profesionale në Bernë, me ç`rast shumica prej tyre janë detyruar ta bëjnë këtë, njofton srf.ch.

Në shkallën e dytë, të huajt marrin informacion më të thelluar për kurse të gjuhës, për përpilimin e dosjeve të kërkimit të punës ose për njohje të diplomave.

Shkalla e tretë sipas ligjit të ri të integrimit nënkupton lidhjen e një marrëveshjeje për integrim që është plotësimi i detyrimit të të huajit për ndjekjen e një kursi të gjuhës ose të ndonjë detyrimi tjetër. Nëse nuk i përmbahet marrëveshjes atij, në shkallen e fundit mund edhe t`i hiqet leja e qëndrimit në Zvicër, përcjell albinfo.ch. Por, duke qenë se ligji vetëm rreth tre muaj që ka filluar të zbatohet, deri tash nuk ka ndodhur kjo e fundit.

Për këtë periudhë të shkurtër të zbatimit të ligjit, autoritetet e qytetit të Bernës kanë nxjerrë një bilanc pozitiv.

“Ne po marrim njoftime pozitive nga të huajt”, thotë Ursula Heitz, udhëheqëse e Qendrës Profesionale të Integrimit. “Ata, përmes bashkëbisedimit tonë të karakterit këshillëdhënës po ndjehen të shoqëruar dhe ne po kemi mundësi që secilit person të përveçëm t`i qasemi në mënyrë individuale”.

Edhe shefi i shërbimit civil, atij për migracion dhe i policisë për të huajt, Alexander Ott ndan mendimin për bilancin pozitiv të deritashëm. Por ai pranon se ka edhe të këqija: koha e pritjes për një paraqitje në komunën e Bernës, me futjen e “bisedës së mirëseardhjes” (shkalla e parë) pothuajse është dyfishuar dhe ajo tash është mesatarisht 50 minuta. Shërbimi civil është përforcuar me një person por për të shkurtuar kohen e pritjes, Ott thotë se duhen hapur edhe dy vende tjera të punës.

Për të ilustruar se si po shkon zbatimi i ligjit të ri, gazeta “Berner Zeitung” ka përcjellë rastin e Vlora Fetahit, një shqiptare 28 vjeçe, e ardhur rishtas nga Kosova në Zvicër. Ajo në Kosovë ka mbaruar ekonominë por edhe si infermiere e stomatologjisë.

Gazeta përshkruan bisedën e mirëseardhjes që i bëhet asaj në zyrën përkatëse në Bernë, ku ajo, përmes përkthyesit, një punëtori social shqiptar, informohet për mundësitë e ndjekjes së kurseve, punësimit etj. Vlora dëshiron të dije nëse mund t` i njihet diploma e fakultetit, ndërsa punëtori social e këshillon atë që të kërkojë punë si infermiere e stomatologjisë pasi që është një profil mjaft i kërkuar, transmeton albinfo.ch.

Por, para kësaj, Vlora duhet të ndjekë një kurs të gjermanishtes. Ajo është përcaktuar për një të tillë që fillon në muajin maj.