Ka filluar protesta e opozitës në Prishtinë

Protestuesit janë duke marshuar drejt Gjykatës Kushtetuese. Atyre u janë bashkuar edhe tre liderët e partive opozitare, Visar Ymeri, Ramush Haradinaj e Fatmir Limaj

Ka filluar protesta e paralajmëruar për sot, e subjekteve politike të opozitës. Në sheshin”Zahir Pajaziti” janë grumbulluar mijëra veta në protestën e thirrur nga Lëvizja Vetëvendosje, Aleanca për Ardhmërinë e Kosovës dhe Nisma për Kosovën, për të vazhduar fillimisht në drejtim të Gjykatës Kushtetuese.

Protestuesit po mbajnë flamuj kombëtar dhe parulla me kërkesat e protestës. Protestuesit janë duke marshuar drejt Gjykatës Kushtetuese. Atyre u janë bashkuar edhe tre liderët e partive opozitare, Visar Ymeri, Ramush Haradinaj e Fatmir Limaj, shkruan rtklive.com.

Nä pankartat që bartin protestuesit mund të lexohen parulla si :“Me hajna nuk ka shtet”, “Hajnat në burg, jo në Qeveri”, “Asociacioni i Serbisë i barabartë me ndarjen e Kosovës”.

Organizatorët kanë paraqitur disa shkaqe kryesore për këtë protestë. Dështimi i sistemit të drejtësisë, Gjykata Speciale, shtrenjtimi i energjisë elektrike, fakti që Forcat e Armatosura të Kosovës nuk do të operojnë në Mitrovicën Veriore, çështja dhe statuti i Trepçës janë kryesoret.
Protesta që sipas “Opozitës së Bashkuar” konsiderohet si protestë gjithë popullore ka filluar nga sheshi “Zahir Pajaziti” dhe do të vazhdojë drejt Gjykatës Kushtetuese, KEDS-it, pastaj te RTK-ja dhe do të përfundojë në sheshin ‘Skenderbeu’ para ndërtesës së Qeverisë së Kosovës.

Mediet në Prishtinë njoftojnë për një letër të cilën policia e ka shpërndarë në mesin e protestuesve përmes të cilës tërheq vërejtjen për rreziqet e një proteste të tillë.

Opozita e konsideron këtë letër si një kërcënim të radhës që u vjen atyre nga qeveritarët.