Kurti thirrje bashkatdhetarëve në Gjermani: Korrigjoni dokumentet

Kosovarët në Gjermani nuk regjistrohen më si shtetas serb, Kurti thirrje bashkatdhetarëve: Korrigjoni dokumentet

Kryeministri i Kosovës, Albin Kurti, e ka mirëpritur vendimin që nga sot e tutje kosovarët në Gjermani do të regjistrohen vetëm si shtetas të Kosovës dhe jo të Serbisë, përcjell albinfo.ch.

Gjatë mbledhjes së Qeverisë, Kurti falënderoi autoritetet gjermane për këtë ndryshim dhe u bëri thirrje bashkatdhetarëve që të korrigjojnë dokumentet e shtetësisë.

“Pas më shumë se 17 vitesh, është gjetur një zgjidhje me autoritetet përkatëse gjermane për regjistrimin e shtetasve të Kosovës.

Për një kohë të gjatë, shumë prej jush jeni detyruar të regjistroheni si shtetas të Serbisë në dokumentacionin gjerman, por kjo padrejtësi tashmë është korrigjuar. Dua të shpreh mirënjohjen për Ministrinë e Punëve të Jashtme dhe Diasporës, e cila ka punuar me përkushtim për të arritur këtë ndryshim të rëndësishëm,” tha Kurti.

Ai theksoi se falë këtij angazhimi, është miratuar një udhëzim që siguron regjistrimin e të gjithë qytetarëve të Kosovës vetëm si shtetas të Republikës së Kosovës. Ky ndryshim ka hyrë në fuqi dhe zbatohet në të gjitha çështjet administrative në Gjermani.

“Ftoj të gjithë bashkatdhetarët tanë që të verifikojnë dhe të bëjnë korrigjimet e nevojshme në dokumentet e tyre,” përfundoi ai.

---