Një tërmet i fuqishëm trondit disa vende të Azisë Juglindore

Një tërmet me magnitudë 7.7 goditi sot Mianmarin, deri tani nuk ka shqiptarë të prekur

Një tërmet i fuqishëm tronditi disa vende të Azisë Juglindore. Përmasat e dëmeve janë ende të paqarta. Spitalet në Mianmar po japin alarmin, përcjell albinfo.ch.

Tërmeti i fortë në Azinë Juglindore, me magnitudë 7.7, që goditi Tajlandën dhe Mianmarin mesditën e së premtes, ka shkaktuar dëme të mëdha.

Nga Mianmari njoftohet për të paktën 21 të vdekur. Portali Mizzima News bazohet për këtë njoftim te organizatat e ndihmës dhe burimet lokale në rajonet e Taungo, Bago, Pyavbve dhe Mandalay. Numri i të vdekurve pritet të shtohet.

Nevojë urgjente për gjak

Sipas gjeneralit Zaw Min Tun, zëdhënës i juntës ushtarake, në spitale po mbërrijnë shumë të plagosur. Prandaj, spitalet kanë nevojë urgjente për furnizime me gjak.

Po në Mianmar, prej tërmetit u shemb një urë dhe disa ndërtesa. Në qytetin Aung Ban është rrëzuar një hotel dhe, sipas ekipeve të shpëtimit, njoftohet se shumë njerëz kanë mbetur të bllokuar.

Nga Mianmari, i cili drejtohet nga junta autoritare, është shpesh e vështirë të dalin informacione.

Në Bangkok u shemb një godinë shumëkatëshe

Sipas policisë dhe ekipeve mjekësore, 43 punëtorë kanë mbetur të bllokuar nën rrënoja. Kryeministri tajlandez shpalli për Bangkokun gjendjen e jashtëzakonshme.

Shërbimi Gjeologjik i SHBA-së dhe Qendra Gjermane për Shkenca Gjeologjike (GFZ) raportuan se tërmeti ishte i cekët, me një thellësi prej 10 kilometrash, dhe epiqendra e tij ndodhej në Mianmar, sipas të dhënave paraprake.

Tërmeti në Mianmar – deri tani nuk ka shqiptarë të prekur

Ministria e Jashtme e Shqipërisë thotë se, deri më tani, nuk ka një raportim për shqiptarë të prekur nga tërmeti. Shqipëria nuk ka ambasadë apo përfaqësi në këtë vend. Kontakti më i afërt është Ambasada në Tokio, përmes së cilës po ndiqet edhe situata në lidhje me shqiptarët.

---