Trumpi emëron politikanin me origjinë serbe si ambasador të SHBA-së në Serbi

Bëhet e ditur se ish-Prokurori i Përgjithshëm i Arizonës, Mark Brnovich, është emëruar ambasador i Shteteve të Bashkuara në Serbi.

Vendimi u bë i ditur të premten nga presidenti Donald Trump, i cili e cilësoi Brnovichin si një përfaqësues të përkushtuar të vlerave amerikane dhe një avokat të fortë për lirinë, në një postim në rrjetin social “Truth Social”.

“Si bir i refugjatëve që ikën nga komunizmi, Marku do të jetë avokat i fortë për lirinë dhe gjithmonë do ta vendosë Amerikën të parën. Urime Mark!”, ka shkruar Trump.

Brnovich ka një karrierë të gjatë në fushën e drejtësisë dhe politikës. Ai ka shërbyer si Prokuror i Përgjithshëm i Arizonës për dy mandate, nga viti 2015 deri më 2023, duke luajtur një rol të rëndësishëm në zbatimin e ligjit dhe mbrojtjen e konsumatorëve.

Me origjinë nga ish-Jugosllavia, ai ka rrënjë familjare në Mal të Zi dhe Kroaci, ndërsa prindërit i ka me prejardhje serbe. Ka studiuar shkencat politike në Universitetin Shtetëror të Arizonës dhe ka përfunduar studimet juridike në Universitetin e San Diegos. Përveç karrierës së tij ligjore, ai ka shërbyer edhe në Gardën Kombëtare të Ushtrisë Amerikane.

Brnovich ka qenë figurë aktive në politikën amerikane, duke synuar nominimin republikan për Senatin në zgjedhjet e vitit 2022, por pa sukses. Pas përfundimit të mandatit si prokuror, ai iu bashkua një kompanie të njohur ligjore.

Në detyrën e re si ambasador në Serbi, Brnovich do të zëvendësojë Christopher Hillin dhe pritet të ketë një rol kyç në marrëdhëniet SHBA–Serbi, veçanërisht në çështjet diplomatike dhe politike që lidhen me rajonin e Ballkanit.

Brnovich është i martuar me Susan Brnovichin, gjyqtare federale në Gjykatën e Qarkut të Shteteve të Bashkuara për Distriktin e Arizonës. Ata kanë dy vajza. Ai është anëtar aktiv i komunitetit ortodoks serb në Phoenix.