Mashtruan dhe vodhën identitetin e amerikanëve – kush janë dy kosovarët që u ekstraduan në SHBA

Siç ka raportuar albinfo.ch gjatë ditës, dy persona janë ekstraduar nga Kosova në Shtetet e Bashkuara të Amerikës, për shkak të dyshimit se kanë dëmtuar qytetarët amerikanë.

Kështu bëri të ditur vetë Ambasada e SHBA-ve në Prishtinë.

Ndërkohë, mësohet se dy personat e ekstraduar janë Ardit Kutleshi, 26 vjeç, dhe Jetmir Kutleshi, 28 vjeç. Të dy ishin arrestuar më 12 dhjetor 2024.

Ata akuzohen se mbikëqyrnin faqen e internetit Rydox, ku bëhej shitja e të dhënave personale të vjedhura për kryerjen e krimeve kibernetike dhe mashtrimeve.

Sipas aktakuzës, Rydox kishte gjeneruar të paktën 230 mijë dollarë të ardhura që prej fillimit të saj në shkurt të vitit 2016.

Ardit Kutleshi dhe Jetmir Kutleshi përballen me disa akuza për vjedhje identiteti dhe mashtrim, të gjitha të lidhura me rolin e tyre si administratorë të faqes Rydox.

Ata akuzohen se, ndër të tjera, kishin shitur të dhënat e kartelave të kreditit të mijëra “viktimave që jetojnë në SHBA”.

Sipas Departamentit të Drejtësisë, nëse shpallen fajtorë, ata mund të përballen me:

• 20 vjet burg për akuzën e pastrimit të parave,

• 10 vjet burg për mashtrimin me kartela krediti,

• 5 vjet burg për secilën nga akuzat e vjedhjes së identitetit,

• si dhe një minimum të detyrueshëm prej 2 vjetësh burg për akuzën e vjedhjes së rëndë të identitetit, që duhet të ekzekutohet pas çdo dënimi tjetër.

Në aktakuzën e ngritur nga Distrikti Perëndimor i Pensilvanisë, edhe një shtetas tjetër kosovar, Shpend Sokoli, ishte arrestuar në Shqipëri nga Struktura e Posaçme Kundër Korrupsionit dhe Krimit të Organizuar (SPAK) për të njëjtin rast.