BE-ja paralajmëron kundërpërgjigje ndaj tarifave të Trump: “Kemi një plan të fortë”

(KEYSTONE/Martin Ruetschi)

Presidentja e Komisionit Evropian, Ursula von der Leyen, deklaroi të martën se Bashkimi Evropian është i përgatitur të mbrojë interesat e tij ndaj tarifave të reja të importit që pritet të shpallë presidenti amerikan, Donald Trump. Ajo theksoi se, megjithëse Brukseli synon një zgjidhje të negociuar, BE-ja ka një plan të fuqishëm për të reaguar nëse është e nevojshme, përcjell albinfo.ch.

“Evropa nuk e ka nisur këtë konfrontim. Ne nuk duam domosdoshmërisht të hakmerremi, por do të mbrojmë interesat tona, njerëzit tanë dhe kompanitë tona,” u shpreh von der Leyen në Parlamentin Evropian në Strasburg.

Administrata e Trump ka paralajmëruar një sërë tarifash të reja mbi importet, të cilat ai i ka quajtur si pjesë e “Ditës së Çlirimit” për të korrigjuar, sipas tij, çekuilibrat tregtarë të padrejtë. Një nga masat më të diskutueshme është tarifa 25% mbi automjetet e importuara në SHBA, e cila hyn në fuqi këtë të enjte, ndërsa një tarifë e ngjashme për çelikun dhe aluminin tashmë ka prekur prodhuesit evropianë.

Von der Leyen paralajmëroi se Brukseli do të vlerësojë me kujdes masat e Uashingtonit dhe do të vendosë për kundërmasat e tij deri në mes të prillit. “Të gjitha instrumentet janë në tryezë,” theksoi ajo, duke shtuar se BE-ja ka shumë opsione për reagim, përfshirë fushën e tregtisë, teknologjisë dhe madhësinë e tregut të saj.

Ndërkohë, vendimi i Trump ka shkaktuar pasiguri në tregjet financiare, duke çuar në shitje të gjerë të aksioneve dhe rritur shqetësimet për një recesion të mundshëm. Strategjia e tij tarifore ka përshkallëzuar frikën për një luftë tregtare globale, me rrezikun e hakmarrjeve nga BE-ja, Kina dhe Kanadaja, shkruan DW.

“Kaq shumë evropianë ndihen të dëshpëruar nga ky vendim i Shteteve të Bashkuara,” përfundoi von der Leyen, duke theksuar se do të ishte në interesin e të gjithëve të gjendej një zgjidhje konstruktive për të shmangur një përshkallëzim të mëtejshëm të tensioneve tregtare, përcjell albinfo.ch.