Rriten raportimet për shkelje etike në sportin zviceran, 412 raste të raportuara në vitin 2024

Unsplash, ilustrim

Swiss Sport Integrity, zyra kombëtare dhe e pavarur për raportimin e shkeljeve etike në sport, ka pranuar 412 raportime gjatë vitit të kaluar – një rekord që tregon rritje të vazhdueshme të ndërgjegjësimit dhe besimit në këtë institucion, shkruan SRF, transmeton albinfo.ch.

Shifra e publikuar në konferencën vjetore për media përfaqëson një rritje prej 10 përqind krahasuar me vitin paraprak (374 raste) dhe mbi 50 përqind më shumë se në vitin e parë të funksionimit, kur u raportuan 264 raste.

Sipas Markus Pfisterer, drejtues i Zyrës së Raportimit të Etikës, kjo rritje i atribuohet ndikimit të vendimeve të mëparshme dhe rritjes së njohjes për ekzistencën e institucionit. “Vendimet kanë një ndikim. Ata që preken shohin se diçka po ndodh,” deklaroi ai.

Megjithatë, sfidat mbeten. Zgjatja e procedurave është një ndër kritikat kryesore nga personat e prekur. “Nuk e kemi arritur plotësisht qëllimin tonë për të shkurtuar kohëzgjatjen e procedurave,” pranoi Swiss Sport Integrity, duke shtuar se aktualisht janë 265 raste ende të hapura.

Pfisterer shpjegoi se kohëzgjatja e procedurave ndryshon shumë: disa mund të zgjidhen brenda disa telefonatave, ndërsa të tjerat mund të zgjasin një vit ose më shumë. Nga 412 raportimet e pranuara në vitin 2024, pak më pak se 100 u përkthyen në procedura ligjore.

Në fushën e antidopingut, Swiss Sport Integrity konfirmoi se të gjithë sportistët zviceranë që morën pjesë në Lojërat Olimpike dhe Paralimpike iu nënshtruan të paktën një testi – shumica prej tyre jashtë garës. Në vitin 2024 u morën 13 vendime për shkelje të rregullave antidoping: në 12 raste u shqiptuan ndalime nga tre muaj deri në 14 vjet, ndërsa një rast u konfirmua nga Gjykata e Arbitrazhit për Sportin (CAS) me një ndalim njëvjeçar.

Swiss Sport Integrity thekson nevojën për rritje të mëtejshme të burimeve dhe efikasitetit në trajtimin e rasteve, për të garantuar një sport të pastër dhe me standarde të larta etike, transmeton albinfo.ch.