Pritja e gjatë e Ajetit për shpërthimin te Baseli

Albian Ajeti shkëlqeu të dielën në fitoren 5:1 të Baselit ndaj Servettes. Me këtë fitore Baseli është afruar shumë pranë titullit të kampionit të Zvicrës në futboll, transmeton albinfo.ch.

Sulmuesi 28-vjeçar realizoi dy gola, ndërsa e kishte edhe një asistim. Për një ndeshje e një paraqitje si kjo, Ajeti ka pritur gjatë.

Ai është dashur të presë plot 183 ditë për golat e radhës në kampionat.

Në fillim të edicionit ai luante rregullisht për Baselin, por mbeti shpesh në stol kur u transferua Kevin Carlos.

Golin e kaluar e kishte shënuar më 2 nëntor në fitoren 5:0 ndaj Winterthurit. Tani i ka shtatë gola e gjashtë asistime në 27 paraqitje.

“Isha pranë në disa nga ndeshjet e kaluara dhe e kam ditur se goli do të vijë herët apo vonë”, ka thënë Ajeti, shkruan “Blick”, përcjell albinfo.ch.

Javën e kaluar, Xherdan Shaqiri ishte futbollisti i javës, ndërsa këtë javë është shpallur Albian Ajeti, i cili po ashtu luan për Baselin.

Ai nuk ka dyshuar se do të kthehet te goli. Thotë se gjithnjë është në shërbim të skuadrës. Ajeti bëri një festë të veçantë pas golit të shënuar. Lidhi duart, ndërsa mes këmbëve të tij u shtri bashkëlojtari Dominik Schmid. Ajeti ka treguar se ideja për një festë të tillë ishte e fotografit të Baselit.

“Ai na propozoi dhe ne e bëmë. Është argëtuese, pse jo?”, ka thënë Ajeti.

Baseli po e pret titullin që nga viti 2017. Dhe është shumë pranë që ta fitojë atë. 

“Vetëm kur të vijë koha do t’i pranoj urimet. Por nuk është ende koha. Natyrisht, e kemi në dorën tonë.

Nëse paraqitemi si në javët e fundit, asgjë e pazakontë nuk mund të ndodhë”, ka theksuar Ajeti.

Ndeshja e ardhshme e Baselit është me Luganon. Dhe në atë ndeshje mund të sigurohet titulli.

“Nuk ka rëndësi se si e fitojmë titullin. Gjëja kryesore është ta fitojmë. Tani kemi një tjetër ndeshje të vështirë në Lugano. Duam ta përfundojmë punën atje”.

Pas 34 ndeshjeve, Baseli udhëheq me 64 pikë, nëntë më shumë se Servette e vendit të dytë. Deri në fund janë edhe katër xhiro. Më 1 qershor, Baseli luan edhe në finale të Kupës së Zvicrës. Përballë do ta ketë skuadrën e kategorisë së tretë, Biel.

 

---