Bekim Zogaj zgjidhet Menaxher i Gjyqtarëve Elitë të Zvicrës

Ai do të nxisë më tej zhvillimin dhe profesionalizimin e arbitrimit elitar, duke kryer mes tjerash,analiza të performancës dhe duke udhëhequr ndarjen e skuadrave

Kanë kaluar më pak se një vit që nga “pensionimi” i tij si asistent gjyqtar futbolli në nivelet më të larta zvicerane dhe ndërkombëtare. Por, Bekim Zogaj, ka ende shumë për t`i dhënë profesionit që ka ushtruar për afër tri dekada. Ai është emëruar sot si menaxher i gjyqtarëve elitë të Zvicrës.

Siç shkruan Departamenti i Gjyqtarëve Elitë i Shoqatës Zvicerane të Futbollit (SFV) në një komunikatë të publikuar sot, SFV me një vendim të tij ka emëruar pasardhësin e Brent Reiber-it në pozitën e Menaxherit të Gjyqtarëve Elitë, transmeton albinfo.ch. Duke filluar nga 1 shtatori 2025, Bekim Zogaj do t’i bashkohet SFV-së me kohë të plotë.

Ish – gjyqtari ndihmës me përvojë të gjerë ndërkombëtare ka qenë zëvendës i Kryegjyqtarit Dani Wermelinger në mënyrë të përkohshme që nga fillimi i këtij viti. Kështu, ai kalon nga niveli strategjik në atë operacional të arbitrimit elitar.

Pozicioni në skemën organizative dhe detyrat e 45-vjeçarit nga Cyrihu, i cili e përfundoi karrierën e tij vjeshtën e kaluar me kulmin e pjesëmarrjes në Kampionatin Evropian 2024 me ekipin e arbitrit të njohur Sandro Schärer, janë identike me ato të paraardhësit të tij. Si Menaxher i Gjyqtarëve Elitë, Zogaj merr përgjegjësinë operacionale për gjyqtarët elitë. Ai do të nxisë më tej zhvillimin dhe profesionalizimin e arbitrimit elitar, duke kryer mes tjerash,analiza të performancës dhe duke udhëhequr ndarjen e skuadrave.

“Me Bekim Zogajn, ne po e marrim atë përsipër si një ekspert që është tashmë shumë i njohur me proceset dhe ka lidhje të shkëlqyera kombëtare dhe ndërkombëtare”, thotë Dani Wermelinger. “Dorëzimi i detyrës do të jetë një proces i vazhdueshëm dhe për këtë arsye, nga perspektiva jonë, një proces i qetë. E konsideroj Bekim Zogajn, jo vetëm në rolin e tij si zëvendës, jashtëzakonisht të përkushtuar dhe të apasionuar pas futbollit në një kuptim pozitiv.”

Zogaj do të vazhdojë të punojë në stafin e Departamentit të Inxhinierisë Civile të Qytetit të Winterthur deri në transferimin e tij në postin e ri, transmeton albinfo.ch

“Mezi pres këtë sfidë në SFV”, thotë Bekimi, baba i tre fëmijëve. “Vizionet tona janë të përafërta. Për më shumë se 28 vjet, zemra ime ka qenë te arbitrimi, qoftë si gjyqtar aktiv, si trajner apo si anëtar i ekipit të menaxhimit. Detyrat e ardhshme janë të njohura për mua dhe jam gati t’i përballoj ato me energji të plotë”.

Me ndryshimin në pozicionin e Menaxherit të Gjyqtarëve të Elitës, hapi tjetër është të caktohet pasardhësi i Zogajt si zëvendësdrejtor i departamentit të arbitrimit të elitës në zonën e SFL-së nga Dani Wermelinger, thuhet në komunikatën e SFV.

---