“Duhet ta mposhtësh Serbinë”, kryetari i Bujanocit i jep porosi kapitenit të Shqipërisë

Kryetari i Komunës së Bujanocit, Arbër Pajaziti, ka pritur të mërkurën në kabinetin e tij kapitenin e Kombëtares Shqiptare në futboll, Berat Gjimshiti. Gjatë takimit të përzemërt, Pajaziti shprehu mirënjohje për angazhimin dhe përfaqësimin dinjitoz që Gjimshiti i bën flamurit kuqezi, duke e cilësuar atë si shembull frymëzimi për të rinjtë shqiptarë në Luginën e Preshevës dhe më gjerë, raporton albinfo.ch.

Në një moment të veçantë të takimit, Pajaziti dha edhe një porosi të qartë për mbrojtësin e Shqipërisë dhe Atalantas:

“Duhet ta mposhtësh Serbinë,” – i tha kryetari.

Gjimshiti reagoi menjëherë, duke u përgjigjur shkurt: “Me kësmet.”

Kërkesa e kryetarit u përsërit edhe një herë pas insistimit të një prej të pranishmëve në sallë, ndërsa kapiteni kuqezi shtoi: “Do Zoti.”

Takimi vjen vetëm pak ditë para përballjes së shumëpritur Shqipëri – Serbi, e cila do të zhvillohet më 7 qershor në “Arenën Kombëtare” në Tiranë, si pjesë e kualifikimeve për Kupën e Botës 2026. Kjo ndeshje pritet me interes të jashtëzakonshëm në të gjithë hapësirat shqiptare dhe konsiderohet një nga sfidat më të ndjeshme dhe me peshë të veçantë për Kombëtaren.

Pajaziti e vlerësoi praninë e Gjimshitit në Bujanoc si një mesazh të fuqishëm bashkimi dhe motivimi, duke theksuar se sporti mbetet një urë e rëndësishme për forcimin e identitetit dhe krenarisë kombëtare, transmeton albinfo.ch.