Pse Vjena nuk është më qyteti më i mirë për të jetuar në botë?

Vjena pas tre vjetësh bie nga froni

Tashmë është zyrtare. Pas tre vjetësh radhazi në krye të listes vjetore të përpiluar nga Economist Intelligence Unit (EIU), kryeqyteti austriak është lënë pas nga Kopenhaga.  Kryeqyteti i Danimarkës ka zënë vendin e parë në renditjen e qyteteve më të mirë për të jetuar në botë për vitin 2025, transmeton albinfo.at

ElU, renditi 173 qytete në mbarë botën duke u bazuar në disa faktorë, përfshirë kujdesin shëndetësor, arsimin, stabilitetin, infrastrukturën dhe mjedisin. Kopenhaga triumfoi pasi mori vlerësime “të përkryera” për stabilitetin, arsimin dhe infrastrukturën, ndërsa Vjena u rendit e dyta, për të vijuar me vendin e tretë, Cyrihun. Melburni i Australisë u rendit i katërti, ndërkohë Gjeneva e Zvicrës, e pesta në listë.

Ku humbi pikë Vjena?

Edhe pse Vjena ruajti rezultate të larta në shumicën e kategorive, ajo pësoi një rënie të ndjeshme në vlerësimin për stabilitetin,  faktor ky që ndikoi drejtpërdrejt në humbjen e vendit të parë. Në të kundërt, Kopenhaga mori vlerësime të larta dhe të qëndrueshme në të gjitha kategoritë.

Sipas raportit, rënia e “fortë dhe e papritur” në pikët e Vjenës për stabilitetin i atribuohet një kërcënimi me bombë të një 19 vjeçari, i arrestuar si i dyshuar, si simpatizant i IS-së gjatë një koncerti të Taylor Swift verën e kaluar, që çoi në anulimin e aktivitetit. Po ashtu, plani për të sulmuar me bombë në stacionin kryesor të Vjenës(Hauptbahnhof) i cili ndodhi në fillim të vitit 2025, ishin arsyet kryesore për rënie të pikëve që Vjena mori në fushën e stabilitetit, shkruajnë mediat austriake, transmeton albinfo.at.

“Indeksi Global i Jetëshmërisë 2025” i përpiluar nga departamenti i kërkimit dhe analizës së Grupit Ekonomist të quajtur EIU (Njësia e Inteligjencës Ekonomiste) përfshinë 173 qytete në të gjithë botën dhe vlerësohen bazuar në 30 tregues në pesë kategori.

---