Futbollisti i Mainz05: Nena ime është shqiptare

Nelson Weiper: Kuqezinjtë më kanë kontaktuar për kombëtaren

20 vjeçari Nelson Weiper, golashënuesi më i ri i Mainz05 është shprehur se kuqezinjtë e kanë kontaktuar për kombëtaren e tyre, transmeton albinfo.ch.

Ende i ri por një nga më të dalluarit. Futbollisti në foton e mëposhtme quhet Nelson Weiper, sulmues qendror i shpresave dhe golashënuesi më i ri në historinë e Mainz 05.

Nelson shënoi gol në ndeshjen e fundit të kampionatit europian për U21 kundër Anglisë. Lojtari 192 cm i gjatë shënoi përpara të atit të vëllait që ndodheshin në stadium për të bërë tifo për të.

Kohët e fundit për të ka shfaqur interesim Shqipëria. Nelson e ka pohuar vetë që nga kombëtarja kuqezi e kanë kërkuar të bëhet pjesë e ekipit, pasi nëna e tij është shqiptare.

“Më kanë kontaktuar dhe tashmë më duan për ekipin kombëtar të të rriturve. Është vërtet një burim krenarie kur ekipi i të rriturve të një vendi të dëshiron. Dua të tregoj aftësitë e mia për ekipin gjerman U-21 dhe të luaj mirë për Gjermaninë për aq kohë sa do të më ftojnë. Më pas, nuk e di. Nëse gjërat nuk funksionojnë për Gjermaninë në një moment, e shoh këtë si një mundësi shumë të mirë. Nëna ime i ka rrënjët aty” ka thënë për median gjermane i riu.

---