Operacioni i sotëm, Sveçla: Bojan Jevtiq u arrestua për spiunazh për llogari të strukturave të sigurisë së Serbisë

Ministri i Punëve të Brendshme, Xhelal Sveçla, e ka konfirmuar edhe njëherë arrestimin e eprorit policor Bojan Jevtic, në operacionin kundër spiunazhit të ndërmarrë nga Prokuroria Speciale, Agjencia Kosovare e Inteligjencës dhe Inspektorati Policor i Kosovës, përcjell albinfo.ch.

Sveçla ka thënë se Jevtic është arrestuar nën dyshimin për veprimtari të kundërligjshme të spiunazhit për llogari të strukturave të sigurisë së Serbisë, shkruan Reporteri.net.

“Fatin e këtyre rasteve do ta ketë edhe kushdo tjetër që përpiqet të minojë punën dhe rolin e besuar në Polici. Ndaj, si çdo herë, do të jemi të pakompromistë dhe vigjilentë përballë çdo përpjekjeje që, nëpërmjet hapësirës që vendi ynë u jep në Polici, të kthehet në sulm ndaj Republikës sonë”, ka shkruar Sveçla.

Ai ka lavdëruar institucionet e sigurisë për këtë aksion.

“Profesionalizmi, bashkëpunimi dhe bashkërendimi i institucioneve të sigurisë të Republikës së Kosovës edhe këtë herë ka treguar se është thelbësor në arritjen e rezultateve në luftën kundër veprimtarive të kundërligjshme, në mënyrë specifike atyre me rrezikshmëri të lartë, që shpeshherë e kanë burimin në strukturat e inteligjencës serbe”, ka shkruar Sveçla.