Izmaku: Nëse propozohet emri i Limajt, të hënën mund të konstituohet Kuvendi

Foto: Kuvendi i Kosoves

Pas 48 përpjekjeve të pasuksesshme për konstituimin e Kuvendit të Kosovës, liderët politikë kanë nisur lëvizje të reja për të gjetur një zgjidhje para përfundimit të afatit kushtetues më 26 korrik, transmeton albinfo.ch.

Deputetja e Nismës Socialdemokrate, Xhevahire Izmaku, konfirmoi për Radion Evropa e Lirë se një takim mes kryetarit të kësaj partie, Fatmir Limaj, dhe kryeministrit në detyrë, Albin Kurti, pritet të zhvillohet pasditen e së shtunës. Takimi ka për qëllim gjetjen e një marrëveshjeje për çështjen e pozicionit të kryetarit të Kuvendit.

“Ne qëndrojmë me kërkesën tonë – që mendojmë se është e arsyeshme – për pozitën e kryetarit të Kuvendit. Votat i kemi. Nëse propozohet emri i Fatmir Limajt, atëherë të hënën mund të konstituohet Kuvendi”, deklaroi Izmaku.

Edhe pse nuk ka ende sinjale të qarta nga Lëvizja Vetëvendosje për një marrëveshje, ajo vlerësoi se “ekziston një ambient pozitiv”. Megjithatë, sipas saj, situata mbetet e paparashikueshme, transmeton albinfo.ch.

Po të shtunën në orën 11:00 është thirrur seanca e radhës për përpjekjen e 49-të për konstituim, ndërkohë që afati kushtetues po afrohet. Sipas Aktgjykimit të Gjykatës Kushtetuese në rastin KO124/25, Kuvendi duhet të konstituohet deri më 26 korrik.

Në këtë kuadër, më herët gjatë ditës, Fatmir Limaj është takuar edhe me presidenten e vendit, Vjosa Osmani. Presidenca ka njoftuar se takimi është mbajtur pikërisht në prag të skadimit të afatit kushtetues, ndërsa Osmani ka paralajmëruar se nëse Kuvendi nuk konstituohet brenda këtij afati, ajo do t’i drejtohet sërish Gjykatës Kushtetuese për sqarime të mëtejshme, transmeton albinfo.ch.