Kosova në alarm nga zjarret, 320 raste vetëm këtë javë

MPB

Kosova po përballet me një valë të rrezikshme të të nxehtit ekstrem dhe shpërthimit të zjarreve, me mbi 320 raste të raportuara vetëm gjatë javës së fundit në të gjithë vendin. Sipas Agjencisë për Menaxhimin e Emergjencave (AME), shtatë zjarre janë ende aktive dhe ekipet zjarrfikëse po punojnë në terren për t’i shuar ato, raporton albinfo.ch.

Në një konferencë për media të mbajtur të martën, drejtori i AME-së, Genc Metaj, e cilësoi situatën si të rëndë dhe alarmante. Ai konfirmoi se dy persona kanë humbur jetën si pasojë e zjarreve – një zjarrfikës nga Gjakova dhe një qytetar nga komuna e Klinës. Gjithashtu, dy zjarrfikës janë lënduar gjatë intervenimeve në komunat e Lipjanit dhe Vitisë.

“Vetëm gjatë javës së fundit janë raportuar mbi 320 raste të zjarreve duke përfshirë zjarre malore, fushore por edhe në objekte. Ky numër i madh dhe pasojat e mëdha që sjellin këto zjarre janë alarmante. Gjendja aktuale është e qëndrueshme, por sfidat janë të mëdha,” deklaroi Metaj.

Drejtori i Policisë së Kosovës, Gazmend Hoxha, bëri të ditur se janë arrestuar nëntë persona për zjarrvënie të qëllimshme. Ai tha se Policia ka ndërmarrë mbi 200 intervenime dhe ka iniciuar hetime për 63 raste të zjarrvënieve dhe rrezikimit të përgjithshëm.

“Policia e Kosovës është përfshirë jo vetëm në hetime, por edhe në operacione aktive me autobotë për ndihmë ndaj AME. Do të veprojmë pa hezitim ndaj çdo personi që shkakton zjarr apo rrezik publik. Deri tani janë iniciuar hetime për 63 raste dhe janë arrestuar nëntë persona,” tha Hoxha.

Në konferencë u theksua se një ndër sfidat kryesore mbetet mungesa e vetëdijes qytetare dhe nevoja për ndërgjegjësim më të madh për të mos ndezur zjarre në mënyrë të pakujdesshme apo të qëllimshme.

Sipas Institutit Hidrometeorologjik të Kosovës, vala e të nxehtit do të vazhdojë gjatë gjithë javës, me temperatura që pritet të arrijnë deri në 39 gradë Celsius në fundjavë, duke rritur rrezikun për shpërthime të reja zjarresh, raporton albinfo.ch.