Shqipëria, nyje e gazsjellësit Joniano-Adriatik

Projektit Joniano-Adriatik nis në Fier dhe përfundon në Split të Kroacisë. Ky gazsjellës do të kushtojë 617.6 milionë euro

Gazsjellësi Transadriatik nuk do ta përfundoj projektin ballkanik në Shqipëri, për të kaluar më pas në Itali, por nëpërmjet projektit Joniano-Adriatik do të vazhdojë rrugëtimin nëpër vendet e rajonit deri në Kroaci. Shqipëria në këtë projekt do të jetë nyje që lidhë Italinë dhe vendet e Adriatikut me gaz.

Projektit Joniano-Adriatik nis në Fier dhe duke përshkuar vijën bregdetare drejt veriut, arrin në Malin e Zi e më pas përfundon në Split të Kroacisë. Sipas studimit të fizibilitetit, gazsjellësi do të jetë rreth 511 kilometra i gjatë dhe do të kushtojë 617.6 milionë euro, para që do të financohen nga BE.

Në pjesën shqiptare shuma e investimit është parashikuar të jetë rreth 170 milionë euro dhe do të realizohet përgjatë periudhës 2017-2020.

Një ditë më parë, ministrat e Energjisë së katër vendeve të rajonit, ai Shqipërisë, Bosnjës, Malit të Zi dhe Kroacisë, ranë dakord ta kualifikojnë projektin në listën e prioriteteve që do t’i propozohen Bashkimit Evropian për financim. Për Malin e Zi dhe Bosnjën, gazsjellësi krijon akses në rrjetet e gazit.

Për Shqipërinë, veç investimeve në masën 170 milionë euro dhe krijimit të 250 vendeve të reja të punës, ai mundëson shtrirjen e rrjetit të gazit në zonat më të populluara të vendit. Gazsjellësi Transadriatik ndalon në Fier duke vazhduar drejt Italisë, ndërsa linja Joniano-Adriatike bën të mundur që tubacioni të shtrihet edhe në qytetin e Durrësit, atë të Tiranës dhe Shkodrës.

Paralelisht, ndërtimi i këtij gazsjellësi rrit edhe më shumë pozitat gjeostrategjike të Shqipërisë në rajon, duke e shndërruar atë në nyje të rrjetit rajonal të gazit, raporton TCH. Sipas studimit, gazsjellësi do të transportojë 5 miliardë metër kub gaz në vit, prej të cilave 1 miliardë metër kub do të konsumohen në Shqipëri, 0.5 miliardë në Mal të Zi dhe pjesa tjetër në Bosnje e Kroaci.

Linja është projektuar të funksionojë në dy drejtime, që do të thotë se mund të transportojë gaz si nga Shqipëria drejt Kroacisë, ashtu dhe anasjelltas. Së bashku me autostradën Durrës-Nish, gazsjellësi Joniano-Adriatik është projekti më i rëndësishëm që vendet e rajonit do i propozojnë Bashkimit Evropian.