Skandal në futbollin turk, qindra gjyqtarë nën hetim për vendosje të paligjshme bastesh

Hand of referee with red card and whistle in the soccer stadium.

Federata Turke e Futbollit (TFF) ka zbuluar një skandal të gjerë që përfshin qindra gjyqtarë, të cilët dyshohen se kanë marrë pjesë në veprimtari të paligjshme bastesh sportive. Lajmin e bëri publik presidenti i TFF-së, Ibrahim Haciosmanoglu, i cili premtoi masa të menjëhershme disiplinore.

Sipas një hetimi të brendshëm, nga 571 gjyqtarë të kontrolluar, 371 rezultuan me llogari bastesh, ndërsa 152 prej tyre kanë vënë baste në mënyrë aktive.

“Ne jemi të vendosur ta pastrojmë futbollin turk nga çdo formë korrupsioni. Nuk do të ketë asnjë përjashtim,” deklaroi Haciosmanoglu, duke shtuar se sanksionet do të nisin që nga sot.

Të dhënat tregojnë se 10 prej gjyqtarëve kanë vendosur më shumë se 10 mijë baste secili, ndërsa një prej tyre ka arritur shifrën e 18 227 basteve. Gjithashtu, 42 gjyqtarë kanë vendosur bast në mbi 1 000 ndeshje futbolli.

Në mesin e personave të përfshirë ndodhen edhe 22 gjyqtarë që arbitrojnë në nivel kombëtar – përfshirë 7 kryesorë dhe 15 ndihmës – megjithatë, TFF nuk ka bërë publikë emrat e tyre dhe as nuk ka sqaruar nëse ndonjëri ka vënë bast për ndeshjet që ka arbitruar vetë.

Federata turke është përballur shpesh me akuza për paragjykime dhe korrupsion në arbitrazh. Për të shmangur dyshimet, gjatë pranverës së vitit 2024, TFF nisi praktikën e përdorimit të gjyqtarëve të huaj në sistemin VAR të disa ndeshjeve të Superligës.

Në shkurt të po atij viti, një gjyqtar i huaj u caktua edhe për të drejtuar derbin e zjarrtë Galatasaray–Fenerbahçe, si përpjekje për të rritur besueshmërinë dhe transparencën në fushë.