SH.K.A. “Dardania” feston tri festa në një ditë!

Në vazhdën e aktiviteteve të saj të shumta brenda dhe jashtë Zvicrës, dhe në prag të festave të nëntorit, Shoqëria Kulturore-Artistike “Dardania” nga Winterthuri ka vendosur që këtë herë t’i bashkojë tri ngjarje të mëdha kombëtare në një festë të përbashkët.

 

Kjo mbrëmje solemne do t’i kushtohet:

Kongresit të Manastirit dhe Ditës së Alfabetit Shqiptar,

28 Nëntorit – Ditës së Flamurit Kombëtar dhe të Pavarësisë së Shqipërisë, si dhe

31-vjetorit të themelimit të vetë Shoqërisë Kulturore-Artistike “Dardania”.

Në këtë rast, SH.K.A. “Dardania” do të paraqitet me një program të pasur artistik, me këngë dhe valle premierë, koreografi të reja, veshje të reja kombëtare dhe befasi të shumta gjatë paraqitjeve të tri grupeve të saj të vallëzimit.
Si gjithmonë, kjo shoqëri ruan me përkushtim autenticitetin e kulturës sonë kombëtare, duke ofruar një mbrëmje tërësisht shqiptare – pa ndikime të huaja apo zhanre që nuk i përkasin artit tonë popullor.

Këtu festohet vetëm shqip – me shpirt, traditë dhe krenari kombëtare!

Për ta pasuruar edhe më shumë këtë ngjarje, Këshilli Artistik i SH.K.A. “Dardania” ka ftuar miq dhe bashkëpunëtorë të nderuar, ndër ta: Shoqatën Shqiptare “Iliria” nga St. Gallen, si dhe moderatoren e njohur nga Kosova, znj. Viola Kastrati, e cila do të shoqërohet nga Lavdim Klaiqi, drejtues i “Tele Komuna” – Dardana (Kamenicë).

Në mesin e të ftuarve do të jetë edhe z. Gëzim Alimehmeti, drejtor i FIDAF-it për Shqipërinë dhe njëherazi koreograf i valleve të reja pranë kësaj qendre kulturore, si dhe përfaqësues të diplomacisë shqiptare në Zvicër.

Kjo mbrëmje do të jetë një manifestim i artit, kulturës dhe krenarisë kombëtare, ku përmes këngës, valles dhe simbolikës kuqezi, “Dardania” dëshmon edhe një herë se mbetet një ndër shtyllat më të forta të kulturës shqiptare në diasporë.

Ejani të festojmë së bashku – pa hyrje me pagesë, pa asnjë obligim – dhe ndihuni, së paku për një mbrëmje, shqiptarë!
Ju mirëpresim me zemërgjerësi!

Ngjarja do të mbahet më:
22 nëntor 2025
Aula, Kantonsschule Rychenberg
Rychenbergstrasse 110, 8400 Winterthur
Hapen dyert: 19:00 | Programi artistik: 20:00–22:00

 

---