Zvicra kërkon më shumë transparencë nga platformat e mëdha digjitale

Google, Meta, X (ish-Twitter) dhe TikTok do të duhet të jenë më transparente në Zvicër. Këshilli Federal nisi të mërkurën një konsultim publik mbi një projektligj që synon të forcojë transparencën e platformave të mëdha digjitale, me qëllim mbrojtjen e të drejtave të përdoruesve.

Sipas Këshillit Federal, gjithnjë e më shumë qytetarë zviceranë informohen përmes platformave si Google, TikTok, Facebook dhe X. Këto mjete ndikojnë në komunikimin publik dhe në formimin e opinionit, ndërsa vendosin vetë rregullat e tyre të komunikimit.

Më shumë transparencë dhe të drejtë ankimi

Sipas projektligjit, platformat do të jenë të detyruara të japin sqarime kur fshijnë përmbajtje apo bllokojnë llogari. Përdoruesit e prekur duhet të informohen dhe të kenë mundësi të sfidojnë vendimet e kompanive.

Gjithashtu, kompanitë si Facebook dhe Google do të duhet të krijojnë një procedurë të brendshme ankesash dhe të marrin pjesë në një proces zgjidhjeje jashtëgjyqësore, në mënyrë që përdoruesit të mund të kërkojnë rishikim të vendimeve.

Raportimi i përmbajtjes së paligjshme

Platformat do të jenë të detyruara të vendosin një sistem të thjeshtë për raportimin e përmbajtjeve potencialisht të paligjshme, si shpifja, fyerjet, diskriminimi apo nxitja e urrejtjes.

Nëse selia e kompanisë ndodhet jashtë vendit, ajo do të duhet të emërojë një përfaqësues ligjor në Zvicër, për të garantuar zbatimin efektiv të ligjit.

Ligji do të prekë vetëm platformat shumë të mëdha

Ligji do të zbatohet vetëm për platformat që arrijnë të paktën 10% të qytetarëve çdo ditë – pra, rreth 5 deri në 15 kompani shumë të mëdha. Platformat jofitimprurëse, si Wikipedia, si dhe ato edukative, nuk do të përfshihen.

Periudha e konsultimit do të zgjasë deri më 16 shkurt.

Një projekt i shumëpritur

Qeveria Federale kishte pranuar nevojën për një ligj të tillë që në prill 2023 dhe kishte kërkuar përgatitjen e një dokumenti konsultimi deri në mars 2024.

Megjithatë, në shkurt, gjatë një samiti për inteligjencën artificiale në Paris, zëvendëspresidenti amerikan JD Vance paralajmëroi kundër “rregullimit të tepërt”, i cili sipas tij mund të dëmtonte një industri të dominuar nga SHBA. Kjo, si dhe diskutimet tregtare për tarifat doganore, kishin vonuar vendimin. Tani, Këshilli Federal vlerëson se rreziku i kundërpërgjigjeve ekonomike është i ulët.

 

---