Pesë vjet që nga sulmi terrorist në Vjenë

Sot është shënuar përvjetori i pestë i sulmit terrorist në qendër të qytetit të Vjenës. Më 2 nëntor 2020, një banues në Austri me rrënjë shqiptare nga Maqedonia e Veriut, i moshës së atëhershme, 20-vjeçar, qëlloi dhe vrau katër persona dhe plagosi rëndë 23 të tjerë. Një ceremoni vendosjeje kurorash u mbajt sot në përkujtim të tij. Hetimi për sulmin konsiderohet i përfunduar, shkruan orf.at, përcjell albinfo.at

Këtë vit, ashtu si në vitet e kaluara, viktimat e sulmit terrorist u përkujtuan në Desider-Friedmann-Platz në lagjen e parë. Ndër ata që vendosën kurora të dielën në mëngjes ishin kryetari i bashkisë Michael Ludwig (SPÖ), zëvendëskancelari Andreas Babler (SPÖ) dhe ministri i brendshëm Gerhard Karner (ÖVP), si dhe personalitete tjera politike, transmeton albinfo.at

Karl Nehammer (ÖVP), i cili ishte Ministër i Brendshëm në kohën e sulmit dhe më vonë u bë Kancelar, gjithashtu mori pjesë në shërbimin përkujtimor. Pasardhësi i tij si Kancelar, Christian Stocker (ÖVP), nuk mundi të merrte pjesë për arsye shëndetësore. Presidenti Federal Alexander Van der Bellen gjithashtu mungoi.

Dënime të gjata me burg për bashkëpunëtorët

Mbrëmjen e 2 nëntorit 2020, një mbështetës 20-vjeçar i grupit terrorist Shteti Islamik hapi zjarr ndaj kalimtarëve rreth zonës së jetës së natës në Trekëndëshin e Bermudës në Vjenë. Katër persona vdiqën si pasojë e të shtënave me armë zjarri të sulmuesit. Dy burra, të moshës 21 dhe 39 vjeç(v.j: njëri ndër ta, një shqiptar poashtu nga Maqedonia e Veriut), dhe një grua 24-vjeçare vdiqën menjëherë, ndërsa një grua 44-vjeçare ndërroi jetë nga plagët e marra në spital të nesërmen. Gjithsej 23 persona u plagosën. Vetë sulmuesi u përball dhe u qëllua për vdekje nga policia pranë Kishës së Shën Rupertit.

Bashkëpunëtorët, të cilët ndihmuan sulmuesin në sigurimin e armëve, morën dënimet maksimale të mundshme sipas ligjit: tre burgime të përjetshme dhe një dënim me 20 vjet burg. Dy të pandehurit e tjerë morën dënime me disa muaj për anëtarësim në një organizatë terroriste, por u liruan nga akuzat për përfshirje në vrasjet e shumëfishta.