BE planifikon të thjeshtojë rregulloret për inteligjencën artificiale

(KEYSTONE/DPA/Frank Rumpenhorst)

Bashkimi Evropian ka njoftuar propozime të reja për të ulur barrën rregullatore në fushën e inteligjencës artificiale dhe të dhënave, me synimin për të rritur konkurrueshmërinë dhe për të zvogëluar hendekun teknologjik të Evropës.

Komisioni Evropian propozon shtyrjen e afatit të zbatimit të rregullave për sistemet e inteligjencës artificiale “me rrezik të lartë” deri në fund të vitit 2027, një vit më shumë se afati aktual. Këto sisteme prekin fusha të ndjeshme si siguria, shëndeti dhe të drejtat themelore të qytetarëve.

Kompanitë e sektorit kishin paralajmëruar se nuk do të ishin gati në kohë, ndërsa Komisioni thotë se synon të ulë burokracinë dhe kostot. Kundërshtarët e relaksimit të rregullave argumentojnë se problemi i Evropës nuk është rregullimi, por mungesa e investimeve dhe kompanive të mëdha teknologjike.

Propozimet përfshijnë edhe mundësinë e përdorimit të të dhënave private për zhvillimin e modeleve të AI-së në rast “interesi legjitim”, gjë që ka shkaktuar shqetësim të madh tek organizatat e mbrojtjes së të dhënave personale, transmeton albinfo.ch.

Ndryshime të tjera synojnë reduktimin e banerëve të cookies që shfaqen në faqet e internetit, duke u lejuar përdoruesve të vendosin preferencat e tyre me një klik dhe t’i ruajnë ato në mënyrë të përhershme në shfletues.

Propozimet priten të shkaktojnë debat të gjerë në Parlamentin Evropian.