Ngjyrat e tatuazheve dëmtojnë sistemin imunitar, sipas një studimi zviceran

Një studim i ri tregon se bojërat e tatuazheve mund të ndikojnë në aftësinë e sistemit imunitar për t’u mbrojtur me kalimin e kohës. Kjo është përfundimi befasues i një ekipi nga Instituti i Kërkimeve Biomedikale.

Sipas studimit, bojërat e tatuazheve jo vetëm që mbeten në lëkurë, por gjithashtu grumbullohen shpejt në nyjet limfatike dhe mund të ngelen aty për vite me radhë. Këto nyje janë organe kyçe të sistemit imunitar, shpjegon Universiteti i Zvicrës Italiane (USI), i cili është i lidhur me institutin kërkimor, në një komunikatë për shtyp.

Bojra e bllokuar në nyjet limfatike shkakton reagim nga qelizat imunitare që ndodhen aty. Makrofagët e kapin aktivisht pigmentet, duke nisur një përgjigje inflamatore. Kjo përgjigje ka një fazë fillestare akute që zgjat dy ditë, para se të bëhet kronike.

Faza kronike, e cila mund të zgjasë për vite, është veçanërisht shqetësuese sepse dobëson sistemin imunitar, duke rritur ndjeshmërinë ndaj infeksioneve dhe kancerit. Makrofagët nuk mund të thyejnë bojën e tatuazhit, dhe pas konsumimit të pigmentit, qelizat imunitare vdesin. Ky fenomen është më i shprehur me bojrat e kuqe dhe të zeza, duke sugjeruar se disa ngjyra mund të jenë më toksike, transmeton albinfo.ch.

Ky proces i vazhdueshëm i kapjes dhe vdekjes së qelizave çon me kohë në çrregullime të funksionimit normal të sistemit imunitar, i cili ka rolin kryesor për të mbrojtur trupin nga infeksionet dhe kanceri. Rezultatet e këtij studimi shtatëvjeçar ngrejnë shqetësime serioze për sigurinë e tatuazheve, thekson USI.

Një në pesë persona në botë

Studiuesit përdorën modelet e minjve dhe vullnetarë njerëz për të kuptuar se si shpërndahej boja e tatuazhit në trup. Ata gjithashtu analizuan nëse vaksinat mund të jenë më pak efektive kur injektohen në krahët e tatuazhuar. Rezultatet treguan se minjtë e tatuazhuar prodhuan një sasi dukshëm më të ulët antitrupash pas vaksinimit, ndoshta për shkak të funksionimit të ndryshuar të qelizave imunitare që lidhen me bojën për periudha të gjata.

Studimi është botuar të enjten në revistën prestigjioze Proceedings of the National Academy of Sciences dhe ka rëndësi të madhe, pasi tatuazhet janë bërë tashmë një fenomen global – një në pesë persona në botë ka të paktën një tatuazh.