Hapet shkolla shqipe në Wittenbach të Zvicrës

Një ngjarje me rëndësi për komunitetin shqiptar në Wittenbach u shënua këtë javë me hapjen e një pike të re të “Shkollës Shqipe”, një iniciativë e pritur me padurim nga prindërit dhe fëmijët e zonës.

Hapja e shkollës ndodhi pak para 28 Nëntorit, duke i dhënë fëmijëve mundësinë të nisin mësimin e gjuhës shqipe për herë të parë, transmeton albinfo.ch.

Mësuesja Artjola Ferizi, me përvojë të gjatë në arsim, priti nxënësit duke u siguruar që gjithçka të ishte gati për ditën e parë: tekstet mësimore, materialet dhe një atmosferë mikpritëse, ku fëmijët ndihen si në shtëpi. Libri dhe abetarët e përdorur u siguruan falas nga Qendra e Botimeve për Diasporën, në bashkëpunim me Ministrinë e Arsimit dhe Ambasadën e Shqipërisë në Zvicër.

Në orën e parë morën pjesë fëmijët Dauti, Asja, Elina, Eljona, Ameli, Medini, Luani dhe Drini. Fytyrat e tyre të buzëqeshura mbushën klasën me energji dhe kuriozitet për të mësuar mbi gjuhën dhe kulturën e tyre.

Ky hap tregon vendosmërinë e komunitetit shqiptar për të ruajtur gjuhën dhe identitetin kulturor dhe për t’ua transmetuar brezit të ri si vlerë të patjetërsueshme. Shkolla Shqipe në Wittenbach i fton të gjithë prindërit që të angazhojnë fëmijët e tyre në këtë rrugëtim të dijes dhe identitetit.