Stokholm: Kosova promovon potencialin turistik në panairin ndërkombëtar “Travel News Market”

Në Stokholm të Suedisë po zhvillohet panairi i turizmit “Travel News Market”, ku Kosova po promovon potencialet e saj turistike para një audience të gjerë ndërkombëtare. Kjo ngjarje, e njohur si një ndër platformat kryesore të industrisë së turizmit në rajonin nordik, mbledh profesionistë, operatorë turistikë dhe partnerë globalë, përcjell albinfo.ch.

Pjesëmarrja e kompanive të Kosovës në këtë panair është mundësuar nga Ministria e Industrisë, Ndërmarrësisë dhe Tregtisë (MINT), përmes Agjencisë për Investime dhe Përkrahjen e Ndërmarrjeve në Kosovë (KIESA), në bashkëpunim me projektin FEGO.

Kosova po përfaqësohet nga shtatë kompani të sektorit të turizmit: Outdoor Kosovo, Butterfly Outdoor Adventure, SuperXplorers, LynxFreeride, Balkan Destination, Happy Trail, 7 Arte – Visit Trepça.

Përmes prezantimeve të tyre, ato po shfaqin ofertat dhe paketat turistike para tregut skandinav, me synimin për të rritur bashkëpunimet, për të krijuar lidhje të reja kontraktuale dhe për të fuqizuar praninë e Kosovës si një destinacion i qëndrueshëm dhe atraktiv për turistët nordikë.

Ky prezantim i përbashkët i kompanive kosovare shënon një hap të rëndësishëm drejt zgjerimit të ofertës turistike të vendit në skenën ndërkombëtare, duke krijuar mundësi të reja për bashkëpunim, marrëveshje biznesi dhe zhvillim të mëtejshëm të sektorit të turizmit.

Gjatë vizitës në Stokholm u zhvilluan edhe takime B2B në Ambasadën e Kosovës, nën mikpritjen e ambasadores Shkendije Geci Sherifi. Në këto takime, zyrtarët e MINT/KIESA prezantuan para operatorëve suedezë prioritetet strategjike dhe promovuan potencialet turistike të vendit, ndërsa operatorët nga Kosova patën mundësinë të paraqesin produktet dhe ofertat atraktive turistike, duke identifikuar partnerë të rinj për bashkëpunim.