Paris: Inaugurohet Qendra Kulturore e Shqiptarëve

Paris: Inaugurohet Qendra Kulturore “28.11”, hapësirë e re për komunitetin shqiptar

Në Ditën e Flamurit inaugurohet Qendra Kulturore e Shqiptarëve në zemër të Parisit, transmeton albinfo.ch.

Më 28 nëntor 2025, në Ditën e Flamurit, një nga datat më të rëndësishme të historisë shqiptare, Ambasada e Republikës së Kosovës në Francë mori pjesë me nder në inaugurimin e Qendrës Kulturore të Shqiptarëve “28.11” në Paris.

Ngjarja u zhvillua në një atmosferë festive dhe simbolike, ku morën pjesë përfaqësues të institucioneve, komunitetit shqiptar dhe dashamirës të kulturës. Ambasadori i Republikës së Kosovës në Francë, Mehdi Halimi, mbajti një fjalë rasti me këtë rast, duke vënë në pah rëndësinë e kësaj hapësire të re për komunitetin shqiptar.

Përurimi u shoqërua me interpretime artistike dhe ekspozitën e parë të artistit Indris Huqi, duke sjellë para publikut vlera autentike të artit dhe trashëgimisë sonë kulturore. Aktivitetet krijuan një atmosferë të ngrohtë dhe emocionuese, që dëshmoi fuqinë e kulturës për të bashkuar njerëzit kudo që ndodhen.

Ambasada e Kosovës përgëzoi ekipin organizator për punën dhe përkushtimin e tyre, duke uruar që Qendra Kulturore “28.11” të bëhet një prej pikave kryesore të bashkëpunimit, ruajtjes së identitetit dhe promovimit të kulturës shqiptare në Francë.

Kjo qendër e re synon të shërbejë si urë lidhëse mes gjeneratave dhe një hapësirë ku shqiptarët në Francë të mund të kultivojnë dhe forcojnë rrënjët e tyre kulturore, duke kontribuar njëkohësisht në jetën kulturore të Parisit./Albinfo.ch.

https://www.facebook.com/share/p/1RKoGkMGGZ/?mibextid=wwXIfr

---