Airbnb gjobitet me 56 milionë paund në Spanjë për reklamat e pronave pa licencë

(KEYSTONE/Christian Beutler)

Qeveria e Spanjës ka vendosur një gjobë prej 64 milionë eurosh (rreth 56 milionë paund) ndaj platformës së njohur të qiradhënies së pronave, Airbnb, për reklamimin e apartamenteve që nuk kishin licencë të rregullt për të operuar.

Disa nga pronat e listuara ishin gjithashtu të ndaluara për dhënie me qira, një çështje që ka shkaktuar shqetësim në vendin me një sektor të gjallë turistik. Shtimi i kërkesës nga vizitorët ka rritur çmimet e strehimit dhe ka bërë që shumë banorë vendas të ndihen të përjashtuar nga tregu, sipas raportimeve të BBC.

Ministri spanjoll për të drejtat e konsumatorit, Pablo Bustinduy, theksoi se “ka mijëra familje që jetojnë në kufijtë e varfërisë për shkak të kostove të larta të strehimit, ndërsa disa përfitojnë nga modelet e biznesit që i largojnë njerëzit nga shtëpitë e tyre.”

Qeveria ka monitoruar dhe kufizuar qiratë afatshkurtra për të parandaluar ndikimin negativ në lagje, veçanërisht për shkak të popullsisë së përkohshme të turistëve. Një betejë e gjatë ka qenë duke u zhvilluar për të kontrolluar mijëra listime të Airbnb-së, duke ndaluar ose kufizuar disa prej tyre. Në maj, pati edhe protesta kundër platformës para sezonit të ngjeshur veror.

Sipas autoriteteve spanjolle, 65,122 lista në Airbnb nuk respektuan rregullat e konsumatorit, duke përfshirë promovimin e pronave pa licencë ose me numra licence që nuk përputheshin me regjistrat zyrtarë.

Ministri Bustinduy u shpreh në rrjetin social Bluesky: “Do të veprojmë sa herë të jetë e nevojshme: asnjë kompani, pavarësisht madhësisë apo fuqisë, nuk është mbi ligjin, veçanërisht kur bëhet fjalë për strehimin.”

Në mbarë botën, qytete turistike si Barcelona, Nju Jork, Berlin, Paris dhe San Francisco kanë vendosur kufizime të ngjashme ndaj Airbnb-së. Platforma, e themeluar në 2007 dhe bërë mjaft popullore pas 2014-ës, u shndërrua në një opsion të lirë akomodimi, duke lejuar çdo përdorues të bëhej “mikpritës” dhe të fitonte para shtesë. Megjithatë, shumë qytete të mëdha kanë vendosur kufizime për të kontrolluar ankesa mbi festa të zhurmshme dhe mungesë të mikpritësve.