Kurti: Kosova masat më të mëdha financiare s’i ka vuajtur nga BE-ja, por nga opozita

Kurti mirëpret heqjen e masave të BE-së, por akuzon opozitën për bllokimin e mbi një miliard eurove

Kryeministri në detyrë, Albin Kurti, ka deklaruar se e mirëpret vendimin e Bashkimit Evropian për heqjen e masave ndaj Kosovës, por njëkohësisht ka hedhur akuza ndaj opozitës parlamentare, të cilën e ka fajësuar për vendosjen e “masave më të mëdha financiare” ndaj vendit.

Duke folur në mbledhjen e Qeverisë në detyrë të mbajtur të premten, Kurti tha se opozita, përmes mosvotimit të Planit të Rritjes të BE-së dhe tri marrëveshjeve me Bankën Botërore, ka bllokuar mjete financiare me vlerë të përgjithshme prej mbi një miliard eurosh.

“Republika e Kosovës masat më të mëdha financiare nuk i ka vuajtur nga Bashkimi Evropian, por nga opozita parlamentare. Muajin e kaluar, përkundër insistimit tonë, Kuvendi u shpërnda pa u votuar Plani i Rritjes i BE-së në vlerë prej 880 milionë eurosh dhe tri marrëveshje me Bankën Botërore në vlerë prej 120 milionë euro, pra mbi një miliard euro gjithsej, për shkak të mungesës së votës dhe vullnetit të opozitës,” ka deklaruar Kurti.

Ai ka shtuar se shpreson që pas zgjedhjeve të 28 dhjetorit, “opozita e tanishme t’ia heqë masat Kosovës”.

Kurti i ka cilësuar masat e Bashkimit Evropian ndaj Kosovës si të padrejta, duke theksuar se institucionet e Kosovës nuk kanë qenë përgjegjëse për eskalimin e situatës në katër komunat veriore të vendit.

“Ne e mirëpresim vendimin e BE-së për heqjen e masave që i ishin vendosur Kosovës. Ato ishin të padrejta që nga dita e parë, sepse, së pari, institucionet e Republikës së Kosovës nuk ishin shkaktare të eskalimit të situatës dhe, së dyti, deeskalimi ishte meritë e institucioneve të Kosovës,” ka përfunduar Kurti.

---