Ekspertë të KE-së vlerësojnë përmbushjen e kritereve për liberalizimin e vizave

"Një numër i vogël i kritereve kërkon ende punë në mënyrë që procesi të përmbyllet përfundimisht”

Një grup ekspertësh faktmbledhës për liberalizim të vizave nga Komisioni Evropian (KE) që ka qëndruar në Kosovës nga 13 deri më 17 korrik, ka vlerësuar se përkushtimi i institucioneve të Kosovës për përmbushjen e kritereve, është shtuar i dukshëm, por kjo duhet të vazhdohet edhe më tej. Në një debat që ata e mbajtën të hënën me Ministrinë e Integrimeve Evropiane (MIE), vlerësuan se “një numër i vogël i kritereve kërkon ende punë në mënyrë që procesi të përmbyllet përfundimisht”.

Zëvendësministri i Integrimit Evropian, Ramadan Ilazi, në këtë debat  ka thënë se rëndësia e misionit vlerësues të KE-së “është qenësore sepse raporti që do të hartohet nga ekspertët do të hap rrugë për përmbylljen e procesit të liberalizimit të vizave”.

Ndërkaq Fisnik Rexhepi, këshilltar i lartë politik i ministrit për Integrim Evropian dhe njëherësh koordinator teknik i procesit të liberalizimit, ka bërë të ditur se ekspertët nga KE kanë zhvilluar mbi 50 takime dhe vizita në terren me përfshirje të mbi 100 përfaqësuesve institucional, me ç’rast janë prezantuar të arriturat në adresimin e kritereve teknike të cilat janë vlerësuar nga ekspertët.