Parisi inauguron teleferikun urban më të gjatë në Europë

Foto "X": @Murrenlover

Në periferi të juglindjes së Parisit është vënë zyrtarisht në funksion teleferiku urban më i gjatë në Europë, një projekt që u realizua rreth 17 vjet pas propozimit fillestar.

Linja e re, e para e këtij lloji në kryeqytetin francez, synon të lidhë zona periferike të izoluara dhe me mungesë infrastrukture me rrjetin ekzistues të metrosë, duke ofruar një alternativë të re dhe efikase transporti urban.

Teleferiku shtrihet në një gjatësi prej 4.5 kilometrash dhe përbëhet nga 105 kabina, secila me kapacitet prej 10 pasagjerësh. Sipas autoriteteve, sistemi pritet të transportojë deri në 11 mijë udhëtarë në ditë, duke kaluar mbi rrugët e Parisit.

Megjithëse mban rekordin evropian, teleferiku më i gjatë në botë mbetet ai që lidh qytetet La Paz dhe El Alto në Bolivi, me një gjatësi prej 32 kilometrash.

Koha e udhëtimit me teleferik, përfshirë ndalesat, do të jetë rreth 18 minuta, dukshëm më e shkurtër krahasuar me 40 minutat që nevojiten aktualisht me makinë ose autobus.

Për sa i përket kostos, shërbimi është projektuar të jetë i përballueshëm, pasi pasagjerët mund të përdorin kartë të rikarikueshme ose të blejnë bileta të ndara: 2.50 euro për Linjën 8 të metrosë dhe 2 euro për teleferikun.

Projekti, me një vlerë totale prej 138 milionë eurosh, është konsideruar një zgjidhje më ekonomike krahasuar me ndërtimin e linjave të reja të metrosë për lidhjen e këtyre zonave periferike.