Diaspora voton vs Kosova voton

Shkruan: Emrush T.Shkodra

T’ia atribuosh diasporës rezultatin e zgjedhjeve, qoftë për rritjen apo rënien e votës, është absolutisht e padrejtë dhe, rrjedhimisht, shprehje e injorancës, inatit dhe zilisë. Kjo është rruga më e shkurtër për të fshehur dështimin politik brenda vendit.

Është narrativë e rehatshme për humbësit, por e pavërtetë dhe intelektualisht e varfër. Mërgata, si gjithmonë edhe këtë herë, ka luajtur shumë më tepër rolin e mbështetjes ekonomike dhe financiare ndaj atdheut sesa atë të përfshirjes totale në procesin zgjedhor dhe në përcaktimin e rezultatit final të zgjedhjeve. Subjekti politik për të cilin supozohet se mbështetet nga diaspora ka fituar mbi 50% të votës qytetare brenda vendit.

Prandaj, është nonsens dhe jologjike të pretendohet se diaspora ka dërguar një subjekt të caktuar mbi 50%, nga ku më pas nxirren përfundime se ajo ka pasur ndikim vendimtar në procesin e përgjithshëm elektoral.

Në realitet, impakti i diasporës mund të jetë vetëm 2–3% në nivel kombëtar. Kemi shkruar edhe më parë për arsyet pse subjekti fitues do t’i fitonte zgjedhjet. Kush ka disponim, mund t’i gjejë shkrimet më poshtë dhe t’i lexojë.

Mërgata nuk i fiton dhe nuk i humb zgjedhjet në Kosovë. Ajo nuk ka as kapacitetin numerik, as përfshirjen reale për ta bërë këtë. Roli i saj kryesor vazhdon të mbetet ekonomik: remitencat, mbijetesa familjare dhe stabiliteti financiar i vendit. Kjo fitore nuk bazohet aq në premtimet për të ardhmen, sa në frikën nga e kaluara që mund të rikthehet. Asnjë lëvizje serioze nuk u bë në drejtim të reformimit nga tabori opozitar.

Të gjithë qëndruan komodë në agjendat e tyre elektorale, duke pritur se “Amerika” do t’i sillte në pushtet, me arsyetimin se subjekti tjetër nuk “qëndron mirë” me amerikanët.

Fyerjet si “zagarë dhe zagarica”, dhe kthimi në lista i njerëzve që kishin qenë të përfshirë në afera korruptive dhe krime tjera, duhet pajtuar se pak ndoshta vota ka marr, sa është dashur!

Kjo frikë nga mërgata nuk është politike, është psikologjike. Nuk buron nga numrat, por nga komplekset dhe nga paragjykimet. Ajo mbetet aseti kryesor që mbush arkën familjare, rrjedhimisht buxhetin e vendit, nga i cili përfitojnë të gjitha segmentet e jetës shoqërore. Njerëzit nuk kanë dhe nuk duhet të kenë frikë nga babai, nëna, vëllai, motra, miku apo kushëriri i tyre, vetëm pse cilësohen si mërgatë. Zhgënjyese për ata që ende kërkojnë fajtorë jashtë pasqyrës.