Raporti Kosovë – SHBA tërheq vëmendjen e mediave zvicerane në Davos

Mediat zvicerane i kushtuan vëmendje raportit Kosovë – SHBA pas anëtarësimit në Bordin e Paqes

Kosova ka zyrtarizuar dje anëtarësimin e saj në Bordin e Paqes, një organizatë ndërkombëtare e themeluar nga presidenti amerikan Donald Trump, shkruan albinfo.ch.

Presidentja e Kosovës, Vjosa Osmani, ka nënshkruar dokumentet e anëtarësimit gjatë një ceremonie të mbajtur në Davos të Zvicrës, në kuadër të Forumit Ekonomik Botëror (WEF). Momenti i nënshkrimit u shoqërua me duartrokitje nga vetë Donald Trump, si dhe nga liderë të tjerë botërorë të pranishëm në ceremoni.

Ky zhvillim nuk ka kaluar pa u vënë re edhe nga mediat zvicerane. Gazeta 20 Minuten i ka kushtuar vëmendje të veçantë anëtarësimit të Kosovës në këtë organizatë, duke realizuar një intervistë me presidenten Osmani në Davos.

https://www.facebook.com/share/v/183xsUvfMM/?mibextid=wwXIfr

Sipas medias zvicerane, Kosova i është bashkuar Këshillit të Paqes të Trumpit, ndërsa theksohet se përfshirja e saj është e rëndësishme edhe për faktin se Rusia nuk gëzon të drejtën e vetos në këtë organizatë.

Po ashtu, edhe portali Blick.ch ka publikuar një artikull lidhur me raportet ndërmjet Kosovës dhe Shteteve të Bashkuara, duke ngritur dyshime se presidentja Osmani kishte diçka të rëndësishme për t’i komunikuar presidentit Trump.

“Ndërsa presidentja kosovare u ul në vendin e saj, ajo i pëshpëriti diçka në vesh Trumpit për një kohë. A mos ndoshta bëhej fjalë për një konflikt në Ballkan?”, shkruan Blick.ch, duke spekuluar mbi përmbajtjen e bisedës mes dy liderëve.

Ndërkohë, vlen të theksohet se anëtarësimi i Kosovës në Bordin e Paqes shihet si një hap i rëndësishëm në forcimin e rolit të saj në arenën ndërkombëtare dhe në thellimin e mëtejmë të marrëdhënieve strategjike me Shtetet e Bashkuara të Amerikës./Albinfo.ch

---