Trump pritet të marrë vendim për sulm ndaj Iranit brenda ditësh, shkruan BBC

(AP Photo/Luis M. Alvarez)

Shtetet e Bashkuara të Amerikës po shqyrtojnë seriozisht mundësinë e një sulmi ushtarak ndaj Iranit në ditët në vijim, megjithëse ende mbetet hapësirë për një marrëveshje të minutës së fundit.

Sipas një analize të publikuar nga BBC, gjasat janë që presidenti Donald Trump të japë urdhër për ndërhyrje ushtarake. Media britanike ka paraqitur shtatë skenarë të mundshëm për zhvillimet që mund të pasojnë.

Skenari i parë parasheh sulme ajrore dhe detare të kufizuara, por të sakta, ndaj bazave të Gardës Revolucionare iraniane. Në këtë rast, regjimi mund të rrëzohet dhe vendi të hyjë në një proces tranzicioni drejt demokracisë.

Skenari i dytë nënkupton mbijetesën e regjimit, por me një zbutje të politikave të tij. Ky model krahasohet me situatën në Venezuelë, ndonëse konsiderohet si opsioni më pak i mundshëm.

Skenari i tretë parashikon rënien e regjimit aktual dhe zëvendësimin e tij me një qeveri ushtarake, të dominuar nga figura të Gardës Revolucionare – një zhvillim që shumë analistë e shohin si më realist.

Skenari i katërt përfshin kundërpërgjigjen e Iranit përmes sulmeve ndaj forcave amerikane dhe vendeve fqinje, kryesisht me raketa balistike dhe dronë.

Skenari i pestë lidhet me vendosjen e minave detare në Gjirin Persik, një veprim që do të rrezikonte seriozisht transportin ndërkombëtar dhe furnizimin global me naftë.

Skenari i gjashtë parashikon fundosjen e një anijeje luftarake amerikane, përmes përdorimit masiv të dronëve shpërthyes, duke vënë në provë edhe mbrojtjen e Marinës së SHBA-së.

Ndërsa skenari i shtatë konsiderohet më dramatiku: rrëzimi i regjimit pa një alternativë të qartë, duke e zhytur Iranin, me rreth 93 milionë banorë, në kaos, krizë humanitare dhe valë refugjatësh.