Maqedoni: Dështon propozimi për rritjen e pagës minimale në 600 euro

Propozimi i deputetëve të LSDM-së dhe të Majtës për vendosjen e pagës minimale në 600 euro nuk kaloi në leximin e parë, pasi Komisioni parlamentar për çështje ekonomike e hodhi poshtë. Gjatë diskutimeve, deputetët e partive në pushtet nuk morën pjesë në debat.

Deputeti i LSDM-së, Fatmir Bytyqi, theksoi: “Nuk mund të ndërtohet shtet ku patriotët thonë se duhet të duam më shumë, nëse xhepi dhe stomaku janë bosh. Me xhep dhe stomak bosh, patriotizmi nuk ekziston.”

Jovan Mitreski nga LSDM shtoi se kostoja e ushqimit për një familje katër anëtarëshe tejkalon pagën minimale aktuale. “Një gjevrek dhe një jogurt shkojnë 80 denarë. Për të tre vaktet e ditës, kjo arrin 28.800 denarë në muaj, ndërsa paga minimale është 24.000 denarë,” tha ai raportkn alsat përcjell albinfo.ch.

Nga ana tjetër, deputeti Cekov nga ZNAM e mbështeti rritjen e pagës, duke argumentuar se pavarësisht se produktiviteti në Maqedoni është ndër më të lartat në rajon, inflacioni ka minuar fuqinë blerëse të qytetarëve.

Para fillimit të seancës, Bojan Stojanoski nga VMRO–DPMNE deklaroi se rritja e pagës duhet diskutuar në Këshillin Ekonomiko-Social dhe se qeveria do të punojë për një sistem që garanton rritjen e të gjitha pagave.

Propozimi do të dërgohet edhe në Komisionin për sistem politik dhe më pas në seancë plenare, duke ndjekur procedurën e rregullt.