Trumpi thotë se ushtria amerikane ka bllokuar portet iraniane për t’i bërë presion Teheranit

Dy cisterna u kthyen mbrapsht pas fillimit të operacionit amerikan, ndërsa rritet frika për përshkallëzim të konfliktit dhe goditje të ekonomisë globale

Presidenti i Shteteve të Bashkuara, Donald Trump, deklaroi të hënën se ushtria amerikane ka nisur një bllokadë të porteve iraniane, si pjesë e përpjekjeve për ta detyruar Teheranin të hapë Ngushticën e Hormuzit dhe të pranojë një marrëveshje për t’i dhënë fund luftës që ka zgjatur për më shumë se gjashtë javëc, përcjell albinfo.ch.

Në reagim, Irani ka paralajmëruar se do të përgjigjet me masa ndaj të gjitha porteve në Gjirin Persik dhe Gjirin e Omanit, duke kërcënuar edhe vendet aleate të SHBA-së në rajon.

Sipas gjurmuesit të anijeve MarineTraffic, të paktën dy cisterna që po i afroheshin ngushticës janë kthyer mbrapsht menjëherë pasi bllokada amerikane ka hyrë në fuqi. Ndërkohë, Agjencia britanike e Operacioneve të Tregtisë Detare ka raportuar se bllokada po kufizon “tërë vijën bregdetare të Iranit, përfshirë portet dhe infrastrukturën energjetike”.

Në njoftimin e saj për detarët, agjencia theksoi se kalimi përmes Ngushticës së Hormuzit drejt ose nga vende jo-iraniane nuk raportohej të ishte penguar, por paralajmëroi se anijet mund të hasin “prani ushtarake” në zonë.

Bllokada amerikane dhe kërcënimet iraniane kanë krijuar një përballje të rrezikshme, e cila mund të ketë pasoja serioze për ekonominë globale, duke pasur parasysh se Ngushtica e Hormuzit është një nga rrugët ujore më strategjike për furnizimin botëror me naftë.

Situata po rrit shqetësimet se armëpushimi mund të prishet dhe luftimet të rifillojnë, ndërsa bisedimet për t’i dhënë fund konfliktit, i cili nisi më 28 shkurt me sulmet e SHBA-së dhe Izraelit ndaj Iranit, nuk arritën marrëveshje gjatë fundjavës së kaluar.

Trump: “Bllokada ka nisur”

Duke folur në Shtëpinë e Bardhë, Trump konfirmoi se bllokada ka filluar dhe deklaroi se SHBA-ja nuk mund të lejojë që Irani të përdorë Ngushticën e Hormuzit si mjet presioni ndaj botës.

“Nuk mund të lejojmë që një vend të shantazhojë ose të zhvatë botën, sepse kjo është ajo që po bëjnë”, tha Trump.

Ai la të kuptohet se Uashingtoni mbetet i gatshëm për negociata, duke deklaruar se pala iraniane ka kontaktuar.

“Mund t’ju them se pala tjetër na ka kontaktuar. Ata duhet të bëjnë një marrëveshje”, u shpreh ai.

Ndërkohë, sipas dy zyrtarëve amerikanë dhe një burimi tjetër me njohuri mbi zhvillimet, po zhvillohen diskutime për një raund të dytë negociatash ballë për ballë mes SHBA-së dhe Iranit. Një diplomat nga një prej vendeve ndërmjetësuese ka konfirmuar se Teherani dhe Uashingtoni kanë rënë dakord për vazhdimin e bisedimeve./Albinfo.ch

---