“Zërat e Diasporës” panel i veçantë në kuadër të Samitit të Diasporës Shqiptare

Paneli do të sjellë në fokus profilet e suksesshme të artit shqiptar në diasporë, duke bashkuar emra të njohur ndërkombëtarisht për të diskutuar rolin e krijimtarisë dhe identitetit kulturor shqiptar në skenën bashkëkohore.

Në kuadër të Samitit të Diasporës Shqiptare, Teatri Kombëtar i Operës, Baletit dhe Ansamblit Kombëtar organizon panelin “Zërat e Diasporës – Krijimtaria, identiteti dhe fryma shqiptare në artin bashkëkohor”, i cili do të mbahet nga ora 17:00 deri në 18:15, shkruan albinfo.ch.

Paneli, nën kujdesin e Ministrisë së Turizmit, Kulturës dhe Sportit, do të fokusohet në rolin e artistëve shqiptarë në diasporë si bartës dhe promovues të identitetit kulturor në një kontekst global, duke trajtuar ndikimin e tyre në skenën ndërkombëtare të artit.

Në këtë diskutim do të marrin pjesë:

• Aulon Naçi (Drejtor i Përgjithshëm i TKOBAP)

• Gëzim Myshketa (bariton)

• Salvatore Frega (kompozitor)

• Anbeta Toromani (balerinë)

• Marigona Qerkezi (soprano)

Aktiviteti do të përmbyllet me një përshëndetje artistike nga pjesëmarrësit, duke i dhënë takimit një dimension të veçantë kulturor dhe emocional./Albinfo.ch

---