U hap Panairi Ndërkombëtar i Turizmit “Kosova 2026”

Në këtë edicion po marrin pjesë rreth 400 kompani nga 20 vende të botës, duke e kthyer panairin në një pikë të rëndësishme për industrinë e turizmit

Kosova po prezantohet sot si destinacion turistik përmes një prej ngjarjeve më të rëndësishme të sektorit në vend, Panairit Ndërkombëtar të Turizmit, që po mbahet në Prishtina Mall më 17 dhe 18 prill.

Në këtë edicion po marrin pjesë rreth 400 kompani nga 20 vende të botës, duke e kthyer panairin në një pikë të rëndësishme takimi për industrinë e turizmit dhe për bashkëpunime të reja.

Në ceremoninë hapëse, në emër të Ministrisë së Kulturës dhe Turizmit, fjalën e mori këshilltari i lartë i ministres Bogujevci, Muhedin Nushi.

Vizitorët kanë mundësi të njihen nga afër me ofertën turistike të Kosovës, nga trashëgimia kulturore dhe natyrore, te përvojat autentike që e bëjnë vendin gjithnjë e më tërheqës për vizitorë.

Panairi organizohet nga Unioni i Turizmit të Kosovës, me mbështetjen e Ministrisë së Kulturës dhe Turizmit.

---