Ambasada amerikane kujton hapjen e zyrës së parë zyrtare të SHBA-së në Kosovë

Ambasada e Shteteve të Bashkuara në Prishtinë ka rikujtuar një moment të rëndësishëm në historinë e marrëdhënieve mes Kosovës dhe SHBA-së, duke shënuar përvjetorin e hapjes së Zyrës së Shërbimit Informativ Amerikan në Prishtinë në qershor të vitit 1996, përcjell albinfo.ch.

Përmes një postimi publik, Ambasada theksoi se kjo zyrë përfaqësonte praninë e parë zyrtare amerikane në Kosovë, disa vite para luftës, duke e cilësuar atë si fillimin e një partneriteti të qëndrueshëm mes dy vendeve.

“Shtetet e Bashkuara hapën një Zyrë të Shërbimit Informativ në Prishtinë, duke shënuar praninë e parë zyrtare amerikane në Kosovë. Ishte një hap i vogël që më vonë do të shndërrohej në një partneritet të fuqishëm”, thuhet në mesazhin e Ambasadës.

Përmes këtij rikujtimi, Ambasada Amerikane vuri në pah rrugëtimin e marrëdhënieve SHBA–Kosovë, të cilat ndër vite janë zhvilluar në një partneritet të ngushtë politik, diplomatik dhe strategjik.

Postimi u shoqërua me mesazhe që nënvizojnë miqësinë dhe bashkëpunimin e vazhdueshëm ndërmjet Shteteve të Bashkuara dhe Kosovës./Albinfo.ch