Në Zvicër bakshishi nuk është detyrim, por mbetet një gjest mirënjohjeje

(KEYSTONE/Gaetan Bally)

Nëse planifikoni të vizitoni një restorant, kafene apo të përdorni një taksi në Zvicër, nuk keni detyrim të lini bakshish.

Megjithatë, nëse jeni të kënaqur me shërbimin, lënia e një shume të vogël shtesë vazhdon të jetë një praktikë e zakonshme, transmeton albinfo.ch.

Sipas ekspertëve të etikës së sjelljes, tarifat e shërbimit janë të përfshira në çmimet që paguajnë klientët, ndaj punonjësit nuk varen nga bakshishet si në disa vende të tjera, veçanërisht në SHBA. Për këtë arsye, shumica e klientëve thjesht e rrumbullakosin faturën ose lënë disa franga shtesë si shenjë vlerësimi për një shërbim cilësor.

Në restorante rekomandohet zakonisht rrumbullakosja e faturës ose shtimi i rreth 5–10% vetëm kur shërbimi ka qenë i shkëlqyer. Edhe në kafene, bare dhe taksi, mjafton të rrumbullakosni shumën, ndërsa në hotele është e zakonshme të jepen 1–2 franga zvicerane për bagazh ose për personelin e pastrimit, nëse dëshironi të shprehni mirënjohjen tuaj.

Ekspertët theksojnë se kultura zvicerane e bakshishit ndryshon dukshëm nga ajo amerikane, ku bakshishi konsiderohet pothuajse i domosdoshëm. Në Zvicër ai mbetet një gjest vullnetar dhe një mënyrë për të falënderuar për shërbimin e mirë, jo një detyrim financiar.