Masat e jashtëzakonshme nga temperaturat në Zvicër, nga kinematë falas te bllokimi i kantiereve

Zvicra po përballet me një valë të re të nxehti ekstrem, me temperatura që pritet të arrijnë deri në 35°C deri të hënën e ardhshme. Ky episod vjen vetëm një javë pas valës së parë të vapës, e cila mbingarkoi urgjencat mjekësore dhe shënoi një rritje prej 14% të vdekshmërisë në vend, transmeton albinfo.ch.

​Për të përballuar situatën, kantonet zvicerane kanë aktivizuar planet e emergjencës me disa masa kyçe:

​Kinema falas për të moshuarit: Qyteti i Gjenevës po u ofron qytetarëve mbi 65 vjeç biletë falas në seancat e pasdites në kinematë e klimatizuara, si një mënyrë për t’u mbrojtur nga nxehtësia e shtëpive. Projektet financohen nga bashkia, pasi të dhënat tregojnë se të moshuarit që jetojnë vetëm janë më të rrezikuarit.

​Inspektime dhe ndërprerje pune në kantier: Kantoni Jura ka paralajmëruar kontrolle të rrepta në ndërtim. Sipas rregullave, kur temperatura kalon 33°C në hije, punëtorët duhet të bëjnë 15 minuta pushim çdo orë. Autoritetet kanë të drejtë të pezullojnë punimet nëse këto rregulla shkelen.

​Zbrazja e magazinave të kondicionerëve: Kërkesa e lartë ka sjellë një dyndje masive në dyqane. Platforma të mëdha si Digitec Galaxus raportojnë se kanë shitur në qershor më shumë ventilatorë se gjatë gjithë vitit të kaluar, duke sjellë zbrazje të magazinave në të gjithë Zvicrën dhe Europën.

​Gatishmëri në shtëpitë e kujdesit: Azilet e të moshuarve në Vaud dhe Gjenevë kanë ndryshuar regjimin duke aplikuar hidratim të detyrueshëm, ushqim të lehtë dhe izolim të ndërtesave.

​Autoritetet bëjnë thirrje për vigjilencë dhe solidaritet me fqinjët ose të afërmit që jetojnë vetëm, duke kujtuar se goditjet nga nxehtësia në këto temperatura janë të rrezikshme për jetën.