Ambasada e Kosovës në Bernë ua uron besimtarëve Bajramin

Ambasada e Republikës së Kosovës në Bernë, besimtarëve myslimanë të Kosovës në Konfederatën e Zvicrës dhe Principatën e Liechtenstein-it, për Festën e Bajramit e Kurban Bajramit, u shpreh urimet më të mira, të bindur se gjatë ditëve të kësaj feste do të kaloni çaste të lumtura në familje, me të afërm dhe njerëzit që u rrethojnë, duke e rritur dhe klultivuar edhe më shumë respekti për njëri-tjetrin.

Kurban Bajrami është një festë e shenjtë, ku përmes mënyrave konkrete shprehen veprimet dhe aktet e ndihmës, solidaritetit dhe sakrificës, duke dhuruar për më të dobtit, për më të varfërit, thuhet në një shkresë urimi të dërguar nga Ambasada.

Përgëzojmë dhe urojmë që fryma e kultivimit të solidaritetit dhe sakrificës të jetë përkushtim i juaj i madh, që bashkon njerëzit dhe shton dashurinë mes tyre, duke manifestuar me besim të plotë, tolerancë e mirëkuptim brenda vetes dhe me të tjerët, për të mirën e vetvetes, të shoqërisë aty ku jetoni dhe veproni si dhe të Shtetit të Kosovës – një shtet shembull përparimi dhe harmonie midis njerëzve të përkatësive të ndryshme etnike dhe fetare, thuhet në urimin e dërguar nga Ambasada e Republikës së Kosovës në Bernë.