Franca përballet me sezon rekord zjarresh, afro 40 mijë hektarë pyje dhe bimësi janë shkatërruar

Foto nga arkiva: Keystone, EPA/OSCAR CORRAL

Franca po përballet me një nga sezonet më të rënda të zjarreve në vitet e fundit. Që nga fillimi i vitit, rreth 40 mijë hektarë pyje dhe sipërfaqe me bimësi janë djegur në të gjithë vendin, ka bërë të ditur ministri i Brendshëm francez, Laurent Nunez, përcjell albinfo.ch.

Sipas tij, kjo sipërfaqe është dukshëm më e madhe se ajo e regjistruar gjatë gjithë vitit të kaluar dhe ka tejkaluar edhe nivelin e vitit 2022, i cili konsiderohet si një sezon jashtëzakonisht i vështirë për shkak të zjarreve masive.

Autoritetet franceze kanë arrestuar 111 persona në lidhje me shpërthimin e zjarreve. Ministri Nunez ka deklaruar se shumica e rasteve lidhen me aktivitet njerëzor, duke theksuar se rreth 9 nga 10 zjarre janë shkaktuar qëllimisht ose aksidentalisht nga njerëzit.

Qindra zjarrfikës janë angazhuar aktualisht në përballjen me flakët, veçanërisht në rajonet jugore të vendit, përfshirë Var dhe Korsikën. Autoritetet kanë paralajmëruar se rreziku nga zjarret mbetet i lartë gjatë kësaj jave, për shkak të temperaturave të larta dhe thatësirës së zgjatur.

Për të përballuar situatën, Franca po përdor një flotë të gjerë ajrore kundër zjarreve, me rreth 70 mjete ajrore, përfshirë avionë bombardues uji “Canadair”, avionë “Dash” dhe helikopterë specialë. Qeveria franceze ka porositur edhe katër avionë të rinj “Canadair”, të cilët pritet të hyjnë në përdorim në vitet e ardhshme.

Agjencia franceze e motit “Météo-France” ka vendosur 27 departamente në nivel të lartë rreziku për zjarre pyjore, ndërsa autoritetet vazhdojnë të bëjnë thirrje për kujdes maksimal. /Albinfo.ch